ଫୁଲବାଣୀ: ୬ ବର୍ଷ ପରେ ହଜିଲା ପୁଅକୁ ଫେରିପାଇଲେ ପରିବାର ଲୋକେ । ଦୀର୍ଘ ବର୍ଷ ପରେ ନିଜ ପୁଅକୁ ପାଖରେ ପାଇ ପରିବାର ବର୍ଗ ବିଭୋର ହୋଇପଡ଼ିଛନ୍ତି। ଗାଁରେ ଖେଳିଯାଇଛି ଖୁସିର ଲହରୀ । କନ୍ଧମାଳ ଜିଲ୍ଲା ବାଲିଗୁଡ଼ା ବ୍ଲକ ଅନ୍ତର୍ଗତ ରୁତୁଙ୍ଗିଆ ଗ୍ରାମ ପଞ୍ଚାୟତର ଓହାକିଆ ଗ୍ରାମର ଗୋବିନ୍ଦ ମଲ୍ଲିକ ନାମକ ଜଣେ ନାବାଳକ 2016ରୁ କେଉଁ ଆଡ଼େ ଚାଲିଯାଇ ଘରକୁ ଫେରି ନଥିଲେ ।
ଗୋବିନ୍ଦ କିଛି ଲୋକଙ୍କ ପ୍ରଲୋଭନରେ ପଡ଼ି ଦାଦନ ଖଟିବାକୁ ବାହାର ରାଜ୍ୟକୁ ଚାଲି ଯାଇଥିଲେ । ହେଲେ ସେଠାରେ ସମ୍ପୃକ୍ତ ବ୍ୟକ୍ତି ମାନେ ଗୋବିନ୍ଦକୁ ଛାଡ଼ିଦେଇ କୁଆଡେ ଚାଲିଯାଇଥିଲେ । ଫଳରେ ଗୋବିନ୍ଦ ଆଉ ଘରକୁ ଫେରିନପାରି ବାଟବଣା ହୋଇଯାଇଥିଲେ । ପରିବାର ଲୋକେ ମଧ୍ୟ ଗୋବିନ୍ଦର କୌଣସି ସନ୍ଧାନ ପାଇନଥିଲେ । ଗୋବିନ୍ଦ ରାଜ୍ୟ ବାହାରେ ଜଣେ ଓଡ଼ିଆ ଯୁବକଙ୍କ ସହିତ ସାଙ୍ଗ ହୋଇଥିଲେ । ଉକ୍ତ ସାଙ୍ଗ ସହ କିଛି ଦିନ ପୂର୍ବେ ସେ କଳାହାଣ୍ଡି-ରାୟଗଡ଼ା ସୀମାନ୍ତ ଲାଞ୍ଜିଗଡ଼ ଅଞ୍ଚଳ ଆସି ରହୁଥିଲେ । ଅନ୍ୟପଟେ ଘଟଣା ସମ୍ପର୍କରେ ସୂଚନା ପାଇ ବାଲିଗୁଡ଼ା ଅଞ୍ଚଳର ଯୁବ ସମାଜସେବୀ ଅରୁଣ ନାୟକ ଗୋବିନ୍ଦଙ୍କୁ ଖୋଜିବାରେ ମୁଖ୍ୟ କର୍ଣ୍ଣଧାର ସାଜିଥିଲେ । ଆଖପାଖ ଅଞ୍ଚଳରେ ଗୋବିନ୍ଦର ସନ୍ଧାନ ଜାରି ରଖିଥିଲେ ।