ଫୁଲବାଣୀ:ଜଙ୍ଗଲରୁ ମୃତ୍ତିକା ସଂରକ୍ଷଣ ପିଡିଏମଙ୍କ ଝୁଲନ୍ତା ମୃତଦେହ ଉଦ୍ଧାର । କନ୍ଧମାଳ ଜିଲ୍ଲା କୋଟଗଡ ବ୍ଲକର ପିଡିଏମ ରାମଚନ୍ଦ୍ର କାର୍ଜିଙ୍କ ମୃତଦେହ ଉଦ୍ଧାର ହୋଇଛି । ତୁମୁଡିବନ୍ଧ ଥାନା ବାଟାମାହା ମାଦାଗୁଡା ବାଇପାସ ରାସ୍ତା କଡ଼ରେ ଥିବା ଜଙ୍ଗଲରୁ ଝୁଲନ୍ତା ଅବସ୍ଥାରେ ପିଡିଏମଙ୍କ ମୃତଦେହକୁ ଉଦ୍ଧାର କରାଯାଇଥିବା ବେଳେ ଏହା ହତ୍ୟା ନା ଆତ୍ମହତ୍ୟା ତାହା ବର୍ତ୍ତମାନ ଅସ୍ପଷ୍ଟ ରହିଛି । କୋଟଗଡ ବ୍ଲକ ରଜା ସାହିର ବାସିନ୍ଦା ହେଉଛନ୍ତି ରାମଚନ୍ଦ୍ର କାର୍ଜି ।
ମିଳିଥିବା ସୂଚନା ଅନୁଯାୟୀ, ମୃତ୍ତିକା ସଂରକ୍ଷଣ ପିଡିଏମ ରାମଚନ୍ଦ୍ର କାର୍ଜି ଗତ ବୁଧବାର ସନ୍ଧ୍ୟା ଠାରୁ ଘରୁ କେଉଁଆଡ଼େ ଚାଲିଯାଇଥିଲେ । ଏହାପରେ ଗୁରୁବାର ସକାଳେ କିଛି ଗ୍ରାମବାସୀ ପାଟାମାହା ଜଙ୍ଗଲ ଭିତରେ ତାଙ୍କର ମୃତଦେହ ଝୁଲୁଥିବା ଦେଖିବାକୁ ପାଇଥିଲେ । ଏହାପରେ ପୋଲିସକୁ ଘଟଣା ସମ୍ପର୍କରେ ସୂଚନା ଦେଇଥିଲେ । ଖବର ପରେ ଘଟଣା ସ୍ଥଳରେ ତୁମୁଡିବନ୍ଧ ଥାନା ଭାରପ୍ରାପ୍ତ ଅଧିକାରୀ ଆଶୁତୋଷ ଜେନା, ଏସ ଆଇ ସର୍ବେଶ୍ୱର ଖାଡ଼ଙ୍ଗା, ଏସ ଆଇ କବିରାଜ ବତ୍ରା ପହଞ୍ଚି ମୃତଦେହ ଉଦ୍ଧାର କରିବା ସହ ତଦନ୍ତ ଆରମ୍ଭ କରିଥିଲେ ।