ଫୁଲବାଣୀ:କନ୍ଧମାଳ ଜିଲ୍ଲାରେ ପୁଣି ଜଣେ ଛାତ୍ରୀଙ୍କ ମୃତ୍ୟୁ । ସ୍କୁଲ କର୍ତ୍ତୃପକ୍ଷଙ୍କ ଅବହେଳା ଯୋଗୁଁ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ତେବେ ଏପରି ଅଭିଯୋଗ ଆସିଛି କନ୍ଧମାଳ ଜିଲ୍ଲା ବ୍ରାହ୍ମଣୀଗାଁ ଥାନା ଅଞ୍ଚଳରୁ । ଜଣେ 10ମ ଶ୍ରେଣୀର ଛାତ୍ରୀ ମୃତ୍ୟୁ ହୋଇଥିବା ବେଳେ ଘଟଣାର ଅନୁସନ୍ଧାନ କରୁଛି ବ୍ରାହ୍ମଣି ଗାଁ ପୋଲିସ ।
ବ୍ରାହ୍ମଣୀଗାଁ ଥାନା ଅଧୀନରେ ଥିବା ଉଲିପଦର ସରକାରୀ ବାଳିକା ଉଚ୍ଚବିଦ୍ୟାଳୟରେ ଏକ ଅଭାବନୀୟ ଘଟଣା ଘଟି ଯାଇଛି । ହଷ୍ଟେଲ ଦାୟିତ୍ୱରେ ଥିବା ଅଧିକାରୀଙ୍କ ଦାୟିତ୍ୱହୀନତା ଯୋଗୁଁ ଦଶମ ଶ୍ରେଣୀ ଛାତ୍ରୀର ଜୀବନ ଯାଇଥିବା ଅଭିଯୋଗ ହୋଇଛି । ଉଲିପଦର ସରକାରୀ ବାଳିକା ଉଚ୍ଚବିଦ୍ୟାଳୟର ହଷ୍ଟେଲ ରହି ୧୦ ଶ୍ରେଣୀରେ ପଢ଼ୁ ଥିବା ସୁନେଲି ମାଝିଙ୍କର ମୃତ୍ୟୁ ହୋଇଥିଲା । ତେବେ ମୃତ ସୁନେଲି ମାଝୀଙ୍କ ନିଜ ଘର ଝିଞ୍ଜିରିଗୁଡ଼ା ପଞ୍ଚାୟତର ଗୁମାଣ୍ଡି ଗ୍ରାମ ବୋଲି ଜଣାପଡିଛି ।
ସୂଚନା ମୁତାବକ, ସୋମବାର ଦିନ ସୁନେଲିଙ୍କୁ ଜ୍ୱର ହୋଇ ଗୋଡ଼ ହାତ ବିନ୍ଧିଥିଲା । ସ୍ୱାସ୍ଥ୍ୟ ଅସୁସ୍ଥ ଥିବା ଖବର ଜାଣି ପାରି ଦାୟିତ୍ୱରେ ଥିବା ରୋଷେୟା ମାନେ ମଙ୍ଗଳବାର ଦିନ ବ୍ରାହ୍ମଣୀଗାଁ ଡାକ୍ତରଖାନାକୁ ଚିକିତ୍ସା ପାଇଁ ନେଇଯାଇଥିଲେ । ହେଲେ ଅଧିକ ଚିକିତ୍ସା ପାଇଁ ବଡ ମେଡିକାଲକୁ ନ ନେଇ ଗୁରୁତର ଅବସ୍ଥାରେ ହଷ୍ଟେଲରେ ପକେଇ ରଖିଥିଲେ । ଯାହାରି ଫଳରେ ବୁଧବାର ସକାଳେ ସୁନେଲି ମାଝୀ ଅଧିକ ଦୁର୍ବଳ ହୋଇ ପଡ଼ିବାରୁ ବ୍ରାହ୍ମଣୀଗାଁ ଡାକ୍ତରଖାନାରେ ପହଞ୍ଚାଇ ଥିଲେ କିନ୍ତୁ ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ ।
ଏନେଇ ସ୍ଥାନୀୟ ଥାନା ଅଧିକାରୀ ଚାପଧାରି ପ୍ରଧାନ ଘଟଣା ସ୍ଥଳରେ ପହଞ୍ଚି ମୃତ୍ୟୁର ତନାଘନା ଜାରି ରଖି କେସ ନମ୍ୱର୍ ୧/୨୦୨୩ ରୁଜୁ କରିବା ସହ ମୃତଦେହ ବ୍ୟବଚ୍ଛେଦ ପାଇଁ ପଠାଯାଇଥିବା ଜଣାପଡ଼ିଛି । ହେଲେ ଝିଅର ମୃତ୍ୟୁକୁ ନେଇ ପରିବାର ଲୋକଙ୍କ ସମେତ ଅଞ୍ଚଳବାସୀ ତଦନ୍ତ ଦାବି କରିବା ସହ ହଷ୍ଟେଲ ଦାୟିତ୍ୱରେ ଥିବା ଅଧିକାରୀଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି କରିଛନ୍ତି ।
ଇଟିଭି ଭାରତ, କନ୍ଧମାଳ
