ଫୁଲବାଣୀ: କନ୍ଧମାଳ ଜିଲ୍ଲାରେ ରବିବାର ତ୍ରିସ୍ତରୀୟ ପଞ୍ଚାୟତ ନିର୍ବାଚନର ତୃତୀୟ ପର୍ଯ୍ୟାୟ ଭୋଟ ଗ୍ରହଣ । ଜିଲ୍ଲାର ଫୁଲବାଣୀ ବ୍ଲକ, ଖଜୁରୀପଡା ଓ ଫିରିଙ୍ଗିଆ ବ୍ଲକରେ ସକାଳ ୭ଟାରୁ ଭୋଟ ଗ୍ରହଣ ଆରମ୍ଭ ହେବ । ଏହି ୩ଟି ବ୍ଲକରେ ୬୬୦ ଜଣ ପ୍ରାର୍ଥୀ ସେମାନଙ୍କ ଭାଗ୍ୟ ପରୀକ୍ଷା କରୁଛନ୍ତି । ନିର୍ବାଚନରେ ଭୋଟ ଗ୍ରହଣ ପାଇଁ ବ୍ୟାପକ ପ୍ରସ୍ତୁତି କରାଯାଇଛି । ଫିରିଙ୍ଗିଆ ବ୍ଲକ ମାଓବାଦୀ ପ୍ରବଣ ଅଞ୍ଚଳ ହୋଇଥିବାରୁ ଏସ୍ପି ସେଠାକୁ ଯାଇ ସୁରକ୍ଷା ବ୍ୟବସ୍ଥା ନିରୀକ୍ଷଣ କରୁଛନ୍ତି ।
Panchayat Poll: ଭୋଟ ଗ୍ରହଣ ପାଇଁ ବ୍ୟାପକ ପ୍ରସ୍ତୁତି ମାଓବାଦୀଙ୍କ ଗତିବିଧିକୁ ଦୃଷ୍ଟିରେ ରଖି ଏହି ୩ଟି ବ୍ଲକରେ ୪୧ଟି ବୁଥ୍କୁ ବଦଳାଇ ଦିଆଯାଇଛି । ଯେଉଁ ବୁଥ୍ ବଦଳିଛି, ସେଠାରେ ଭୋଟର ମାନେ କେଉଁ ବୁଥ୍ରେ ଭୋଟ ଦେବେ ତାହା ସେମାନଙ୍କୁ ଜଣାଇ ଦିଆଯାଇଛି । ଫିରିଙ୍ଗିଆ ବ୍ଲକରେ ସର୍ବାଧିକ ୩୧ଟି ବୁଥ୍କୁ ସ୍ଥାନାନ୍ତର କରାଯାଇଥିବା ବେଳେ ଖଜୁରୀପଡାରେ ୭ଟି ଏବଂ ଫୁଲବାଣୀରେ ୩ଟି ବୁଥ୍ ବଦଳିଛି । ଏହି ୩ଟି ବ୍ଲକର ୪୯ଟି ପଞ୍ଚାୟତରେ ୧ ଲକ୍ଷ ୨୩ ହଜାର ୬୦୧ ଜଣ ଭୋଟର ସେମାନଙ୍କ ମତ ସାବ୍ୟସ୍ତ କରିବେ ।
ଫୁଲବାଣୀ ବ୍ଲକର ୧୧ଟି ପଞ୍ଚାୟତରେ ୨୯ ହଜାର ୧୮୩ ଜଣ ଭୋଟର ୧୫୬ଟି ବୁଥ୍ରେ ୧୮୫ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରିବେ । ପ୍ରାର୍ଥୀମାନଙ୍କ ମଧ୍ୟରେ ୩ ଜିଲ୍ଲା ପରିଷଦ, ୪୮ ସରପଞ୍ଚ, ୩୨ ସମିତି ସଭ୍ୟ ଏବଂ ୧୦୫ ଜଣ ୱାର୍ଡ ମେମ୍ବର ନିର୍ବାଚନ ଲଢ଼ୁଛନ୍ତି । ଫରିରିଙ୍ଗିଆ ବ୍ଲକର ୨୪ଟି ପଞ୍ଚାୟତରେ ୩୨୯ ଜଣ ପ୍ରାର୍ଥୀ ନିର୍ବାଚନ ଲଢ଼ୁଛନ୍ତି । ସେମାନଙ୍କ ମଧ୍ୟରେ ୯୮ ଜଣ ସରପଞ୍ଚ, ୭୨ ସମିତି ସଭ୍ୟ, ୧୫୯ ୱାର୍ଡ ମେମ୍ବର, ୧୨ ଓ ୧୩ ନଂ ଜିଲ୍ଲା ପରିଷଦ ଜୋନରେ ୭ ଜଣ ପ୍ରାର୍ଥୀ ନିର୍ବାଚନ ମଇଦାନକୁ ଓହ୍ଲାଇଛନ୍ତି । ମୋଟ ୫୮ ହଜାର ୯୬୫ ଜଣ ଭୋଟର ୨୯୮ଟି ବୁଥ୍ରେ ମତଦାନ କରିବେ ।
ସେହିପରି ଖଜୁରୀପଡା ବ୍ଲକରେ ୧୪୬ ଜଣ ପ୍ରାର୍ଥୀ ନିର୍ବାଚନ ଲଢ଼ୁଛନ୍ତି । ସେମାନଙ୍କ ମଧ୍ୟରେ ୩ ଓ ୪ ନଂ ଜିଲ୍ଲା ପରିଷଦ ଜୋନରେ ୭ ଜଣ, ୪୫ ସରପଞ୍ଚ, ୪୩ ସମିତିସଭ୍ୟ ଓ ୫୧ ଜଣ ୱାର୍ଡ ମେମ୍ବର ରହିଛନ୍ତି । ମୋଟ ୧୮୧ଟି ବୁଥ୍ରେ ୩୮ ହଜାର ୪୫୩ ଜଣ ଭୋଟର ନିଜର ମତ ସାବ୍ୟସ୍ତ କରିବେ । ସମସ୍ତ ମତଦାନ କେନ୍ଦ୍ରକୁ ପୋଲିଂ ପାର୍ଟି ଯାଇ ପହଞ୍ଚିଛନ୍ତି । ନିର୍ବାଚନ ଶାନ୍ତିଶୃଙ୍ଖଳାରେ କରିବା ପାଇଁ ପ୍ରଶାସନ ପକ୍ଷରୁ ବିହୀତ ପଦକ୍ଷେପ ଗ୍ରହଣ କରାଯାଇଛି ।
କନ୍ଧମାଳରୁ ସଞ୍ଜୟ ପାତ୍ର, ଇଟିଭି ଭାରତ
