କନ୍ଧମାଳ: ଶେଷ ହୋଇଛି ଦ୍ବିତୀୟ ପର୍ଯ୍ୟାୟ ମତଦାନ । ଦେଶରେ ମୋଟ ୯୫ ଲୋକସଭା ଆସନ ପାଇଁ ମତଦାନ ହୋଇଥିବା ବେଳେ ରାଜ୍ୟରେ ୫ ଲୋକସଭା ଓ ୩୫ ବିଧାନସଭା ପାଇଁ ଭୋଟଗ୍ରହଣ କରାଯାଇଥିଲା । ତେବେ ସେଥିମଧ୍ୟରେ ଥିଲା ମାଓ ପ୍ରବଣ ଅଞ୍ଚଳ କନ୍ଧମାଳ ଜିଲ୍ଲା । ଏଠାରେ ନିର୍ବାଚନ ସୁରୁଖୁରରେ ସାରିବା କୌଣସି ଚ୍ୟାଲେଞ୍ଜଠାରୁ କମ୍ ନଥିଲା ଜିଲ୍ଲାରେ ନିୟୋଜିତ ଥିବା ପୋଲିଂ କର୍ମଚାରୀଙ୍କ ପାଇଁ । ତେବେ ମତଦାନ ଶେଷ ହେବା ପରେ ଜିଲ୍ଲାର ଦୁର୍ଗମ ବୁଥ ଗୁଡିକରୁ ଫେରୁଛନ୍ତି ପୋଲିଂ କର୍ମଚାରୀ।
ମତଦାନ ସରିବା ପରେ ସେମାନେ ଗତକାଲି ଠାରୁ ଥାନା ଏବଂ ବିଭିନ୍ନ ପଞ୍ଚାୟତ ଅଫିସରେ ଆଶ୍ରୟ ନେଇଥିଲେ । ରାସ୍ତା ସଫା ହେବା ପରେ ସେମାନଙ୍କୁ ଅଣାଯାଉଛି । ଫୁଲବାଣୀର ଏଭଳି 14 ଟି ଦୁର୍ଗମ ବୁଥରେ ନିୟୋଜିତ ଥିବା କର୍ମଚାରୀ ଆଜି ପଲିଟେକ୍ନିକ କଲେଜ ଋଷିଭିଙ୍ଗ ସେଣ୍ଟରରେ ପହଞ୍ଚିଛନ୍ତି । ସେଠାରୁ ସୁରକ୍ଷାର ସହ ସେମାନଙ୍କୁ ନିଜ ନଜ ଘରକୁ ପଠାଯିବ ବୋଲି ଜଣା ପଡିଛି । ତେବେ ଦ୍ବିତୀୟ ପର୍ଯ୍ୟାୟ ମତଦାନ ପୂର୍ବରୁ ମାଓବାଦୀଙ୍କ ଗୁଳିରେ ଟଳି ପଡିଥିଲେ ଜଣେ ମହିଳା ପୋଲିଂ କର୍ମଚାରୀ । ଏହି ଘଟଣା ଜିଲ୍ଲାରେ ନିୟୋଜିତ ଅନ୍ୟାନ୍ୟ ପୋଲିଂ କର୍ମଚାରୀଙ୍କ ମଧ୍ୟରେ ଭୟ ସୃଷ୍ଟି କରିଥିଲା । ତଥାପି ମାଓଭୟକୁ ପଛରେ ଛାଡି ସୁରୁଖୁରୁରେ ହୋଇଥିଲା ମତଦାନ ।