କନ୍ଧମାଳରେ ମାଓ ପୋଷ୍ଟର, ବନ୍ଦ ପାଳନରେ ସାମିଲ ହେବାକୁ ଧମକ

ଫିରିଙ୍ଗିଆ ଅଞ୍ଚଳରେ ପୋଷ୍ଟର ମାରିଲେ ଲାଲବାହିନୀ । ପୋଲିସକୁ ଅସହଯୋଗ ଓ ବନ୍ଦ ପାଳନରେ ସାମିଲ ହେବାକୁ ବ୍ୟାନରରେ ଚେତାବନୀ ଦେଲେ ମାଓବାଦୀ ।

ଫୁଲବାଣୀ: କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ଅନ୍ତର୍ଗତ ସାଡିଙ୍ଗିଆ ପଞ୍ଚାୟତର ତାଜୁଙ୍ଗିଆ ଠାରେ ଦେଖିବାକୁ ମିଳିଛି ମାଓ ପୋଷ୍ଟର । ପୋଲିସକୁ ସହାୟତା ନ କରିବା ଓ ମାଓ ବନ୍ଦ ଡାକରା ବେଳେ ବନ୍ଦ ପାଳନରେ ସାମିଲ ହେବାକୁ ପୋଷ୍ଟରରେ ଆହ୍ବାନ କରାଯାଇଛି ।

କେକେବିଏନ୍ ମାଓ ଡିଭିଜନ୍ ତରଫରୁ ଏହି ଲାଲ ବ୍ୟାନର ମରାଯାଇଥିବା ଉଲ୍ଲେଖ ରହିଛି । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଦେଖାଯାଇଛି ।

ମାଓ ପୋଷ୍ଟର ଲଗାଯିବା ଘଟଣା ଜାଣିବା ପରେ ପୋଲିସ ଉକ୍ତ ସ୍ଥାନରେ ପହଞ୍ଚି ବ୍ୟାନରକୁ ଜବତ କରିଛି । ଏବଂ ଏହା ଲାଲବାହିନୀ ପକ୍ଷରୁ ଲଗାଯାଇଛି କି ନାହିଁ ତାହା ସମ୍ବନ୍ଧରେ ଅଧିକ ତଦନ୍ତ ଜାରି ରଖିଛି ।

କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ