ଫୁଲବାଣୀ: କନ୍ଧମାଳ ଜିଲ୍ଲା ବାଲିଗୁଡାର ବହୁଚର୍ଚ୍ଚିତ ସୂଚନା ଅଧିକାରୀ କର୍ମୀ ତଥା ବାଟାଗୁଡାର ପୂର୍ବତନ ସରପଞ୍ଚ ଅଭିମନ୍ୟୁ ପଣ୍ଡାଙ୍କ ହତ୍ୟାକୁ ବିତିଛି 4ଦିନ । ମାତ୍ର ଏବେ ସୁଦ୍ଧା ପୋଲିସର ହାତଖାଲି ରହିଛି । ପୋଲିସର ନିଷ୍କ୍ରିୟତା ପ୍ରତିବାଦରେ 59 ନମ୍ବର ଜାତୀୟ ରାଜପଥ ଅବରୋଧ କରାଯାଇଥିବା ଦେଖିବାକୁ ମିଳିଛି ।
ଅଭିମନ୍ୟୁ ପଣ୍ଡା ହତ୍ୟାକାରୀ ଗିରଫ ଦାବି
ଏନେଇ ବାଲିଗୁଡାଥାନା ପୋଲିସ ଅପରାଧୀଙ୍କୁ ଧରିବାରେ ସକ୍ଷମ ହୋଇ ନଥିବାରୁ ହତ୍ୟାକାରୀଙ୍କୁ ଗିରଫ ଓ କ୍ଷତିପୂରଣ ଦାବିରେ ଜାତୀୟ ରାଜପଥ-59କୁ ଅବରୋଧ କରିଛନ୍ତି । ଶୁକ୍ରବାର ବାଟାଗୁଡା ସମେତ ଚାରି ପଞ୍ଚାୟତବାସୀ ଏକତ୍ରିତ ହୋଇ ରାସ୍ତାରେ ଟାୟାର ଜାଳି ରାସ୍ତା ଅବରୋଧ କରିଛନ୍ତି ।
ବାଲିଗୁଡା ଥାନା ପୋଲିସ ଓ ବିଡିଓ ଲୋକଙ୍କୁ ବୁଝାସୁଝା କରିଥିଲେ ହେଁ ଜିଦରେ ଅଟଳ ରହିଛନ୍ତି ଗ୍ରାମବାସୀ । ଏପରିକି ବିଡିଓ ନରେଶଚନ୍ଦ୍ର ଶବର ମଧ୍ୟ ମାଜିଷ୍ଟ୍ରେଟ ଦାୟିତ୍ବରେ ଲୋକଙ୍କୁ ବୁଝାସୁଝା ପାଇଁ ଯାଇଥିଲେ ମଧ୍ୟ ଲୋକଙ୍କ ଆକ୍ରୋଶର ଶିକାର ହେବାକୁ ପଡିଥିଲା ।