ଫୁଲବାଣୀ:କନ୍ଧମାଳ ଜିଲ୍ଲାରେ ଲଗାଣ ବର୍ଷା ପ୍ରଭାବରେ ବ୍ୟାପକ କ୍ଷୟକ୍ଷତି ଘଟିଛି । ଜିଲ୍ଲାର ବିଭିନ୍ନ ବ୍ଲକରେ ମୋଟ ୯୩ଟି କଚ୍ଚା ଘର ଭାଙ୍ଗିଛି । ପ୍ରଶାସନ ପକ୍ଷରୁ ମୋଟ ୯୮ ପରିବାରକୁ ପଲିଥିନ ଦିଆଯାଇଥିବା ବେଳେ ଅନ୍ୟାନ୍ୟ ଆନୁସଙ୍ଗିକ ସୁବିଧା ଯୋଗାଇ ଦେଇଛି ।
କନ୍ଧମାଳରେ ଲଗାଣ ବର୍ଷା, ଭାଙ୍ଗିଲା ୯୩ କଚ୍ଚା ଘର
ଫୁଲବାଣୀ ସହର ନାରାୟଣୀ ମନ୍ଦିର ପାଖ ତ୍ରିଦେବ ନଗରରେ ବସବାସ କରୁଥିବା ମୋଟ ୨୦୮ ଜଣଙ୍କୁ ଜିଲ୍ଲା ପ୍ରଶାସନ ପକ୍ଷରୁ ସଂସ୍କୃତି ଭବନ ସଭାଗୃହରେ ରଖାଯାଇ ସେମାନଙ୍କ ଖାଇବା ପିଇବା ବନ୍ଦୋବସ୍ତ କରାଯାଇଥିଲା । ସୋମବାର ବର୍ଷା ନ ହେବାରୁ ସେମାନଙ୍କୁ ତାଙ୍କ ଘରକୁ ଛାଡି ଦିଆଯାଇଛି । ପ୍ରବଳ ବର୍ଷା ସତ୍ତ୍ବେ ଜିଲ୍ଲାକୁ ସଂଯୋଗ କରୁଥିବା ମୁଖ୍ୟ ରାସ୍ତା, ପୋଲ ଆଦିର କିଛି କ୍ଷୟକ୍ଷତି ହୋଇ ନ ଥିବା ଅତିରିକ୍ତ ଜିଲାପାଳ ବସନ୍ତ କୁମାର ସାହୁ ପ୍ରକାଶ କରିଛନ୍ତି ।