କନ୍ଧମାଳ ନାବାଳିକା ଦୁଷ୍କର୍ମ ମାମଲା, ଦୋଷୀକୁ 10 ବର୍ଷ ଜେଲ

କନ୍ଧମାଳ ଜିଲ୍ଲାରେ ଜନୈକ ନାବାଳିକାକୁ ଅପହରଣ ଓ ଦୁଷ୍କର୍ମ ମାମଲାର ଦୋଷୀକୁ ଦଶ ବର୍ଷ ଜେଲ । ସାକ୍ଷୀ ପ୍ରମାଣକୁ ଭିତ୍ତି କରି ଦଣ୍ଡ ଶୁଣାଇଲେ ପୋକ୍ସୋ କୋର୍ଟ । ଅଧିକ ପଢନ୍ତୁ...

ଫୁଲବାଣୀ:କନ୍ଧମାଳ ଜିଲ୍ଲାରେ ଜନୈକ ନାବାଳିକାକୁ ଅପହରଣ ଓ ଦୁଷ୍କର୍ମ ମାମଲାର ଦୋଷୀକୁ ଦଶ ବର୍ଷ ଜେଲ ଦଣ୍ଡ । ଏନେଇ ଫୁଲବାଣୀ ସ୍ଵତନ୍ତ୍ର ପୋକ୍ସୋ କୋର୍ଟରେ ଶୁଣାଣି କରାଯାଇ ଅଦାଲତ ଦୋଷୀକୁ ଦଣ୍ଡ ଦେଇଛନ୍ତି ।

ବେଲଘର ଥାନା ଅଞ୍ଚଳର ଅଭିଯୁକ୍ତ ଶଙ୍କର ପ୍ରଧାନୀକୁ ନାବାଳିକା ଦୁଷ୍କର୍ମ ଅପରାଧରେ ଦୋଷୀ ସାବ୍ୟସ୍ତ କରି ମାନ୍ୟବର ସ୍ୱତନ୍ତ୍ର ଜଜ୍ ପୋକ୍ସୋ କୋର୍ଟ ଫୁଲବାଣୀର ଜଜ୍ ସମର ବିଳାସ ବେହେରା, ଶଙ୍କରକୁ ୧୦ବର୍ଷ ସଶ୍ରମ କାରାଦଣ୍ଡ ଆଦେଶ ଦେଇଛନ୍ତି । ଏଥିସହ ୧୦, ୦୦୦ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି । ଜରିମାନା ଅନାଦେୟ ଅଧିକ 6 ମାସ ଜେଲ ଦଣ୍ଡ ।

ସୂଚନା ଅନୁଯାୟୀ ନାବାଳିକାଟି ଗାଁ ପାଖ ଅନ୍ୟ ଏକ ଗାଁକୁ ଭିଡିଓ ସୋ ଦେଖି ଫେରିବାବେଳେ ବାଟରୁ ଉଠାଇ ନେଇଥିଲା ଶଙ୍କର । ଜଙ୍ଗଲର ଏକ ଖାଲୁଆ ନାଲାରେ ୧୭. ୧. ୨୦୧୪ ରୁ କୋଡ଼ିଏ ତାରିଖ ପର୍ଯ୍ୟନ୍ତ ଅର୍ଥାତ ଦୀର୍ଘ 4 ଦିନ ଧରି ଦୁଷ୍କର୍ମ କରିଥିଲା । ପରେ ଧମକ ଦେଇ କାହାକୁ ନ କହିବା ପାଇଁ କହି ଛାଡି ଦେଇଥିଲା । ଏନେଇ ପୀଡିତା ଜଣକ ନିଜେ ଥାନାରେ ଏତଲା ଦେଇଥିଲେ । ମାମଲାରେ ଅଦାଲତ 6 ଜଣ ସାକ୍ଷୀଙ୍କ ଭିତ୍ତିକୁ ଆଦାର କରି ଦୋଷୀକୁ ଦଣ୍ଡ ଶୁଣାଇଛନ୍ତି । ତେବେ ସରକାରଙ୍କ ତରଫରୁ ଅସୀମ ପ୍ରହରାଜ ମାମଲା ପରିଚାଳନା କରିଥିବା ଜଣାପଡିଛି ।

କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ