କନ୍ଧମାଳରେ ବେଆଇନ ବନ୍ଧୁକ କାରଖାନା ଠାବ, ଜଣେ ଗିରଫ

ଗୁଞ୍ଜିଟି ଜଙ୍ଗଲରେ ଦୀର୍ଘ ଦିନ ଧରି ଚାଲିଥିବା ଏକ ବେଆଇନ ବନ୍ଧୁକ ତିଆରି କାରଖାନାରେ ଦାରିଙ୍ଗବାଡି ପୋଲିସ ଚଢାଉ କରିଛି । ଏହି ଚଢାଉରେ ଦୁଇଟି ବନ୍ଧୁକ, ତିନୋଟି ଅର୍ଦ୍ଧ ନିର୍ମିତ ବନ୍ଧୁକ, ବାରୁଦ, ଗନ୍ ପାଉଡର ଓ ବନ୍ଧୁକ ତିଆରି ସରଞ୍ଜାମ ଜବତ କରିଛି ।

କନ୍ଧମାଳ: ଦାରିଙ୍ଗବାଡି ଥାନା ଅନ୍ତର୍ଗତ ଶ୍ରାନିକେତା ପଞ୍ଚାୟତର ଗୁଞ୍ଜିଟି ଜଙ୍ଗଲରେ ଦୀର୍ଘ ଦିନ ଧରି ଚାଲିଥିବା ଏକ ବେଆଇନ ବନ୍ଧୁକ ତିଆରି କାରଖାନାରେ ଦାରିଙ୍ଗବାଡି ପୋଲିସ ଚଢାଉ କରିଛି । ଏହି ଚଢାଉରେ ଦୁଇଟି ବନ୍ଧୁକ, ତିନୋଟି ଅର୍ଦ୍ଧ ନିର୍ମିତ ବନ୍ଧୁକ, ବାରୁଦ, ଗନ୍ ପାଉଡର୍, ବନ୍ଧୁକ ତିଆରି ସରଞ୍ଜାମ ଜବତ କରିଛି । ଏଥିରେ ସଂପୃକ୍ତ ଜଣକୁ ପୋଲିସ ଗିରଫ କରିଥିବା ବେଳେ ଅନ୍ୟ ଦୁଇ ଜଣ ଫେରାର ହୋଇଯାଇଛନ୍ତି । ଗିରଫ ହୋଇଥିବା ବ୍ୟକ୍ତି ଜଣକ ନୂଆସାହିର ଟୁନା ପ୍ରଧାନ(35) ବୋଲି ଜଣା ପଡିଛି । ତାଠାରୁ ଅନେକ ତଥ୍ୟ ମିଳିଥିବା ପୋଲିସ ସୂଚନା ଦେଇଛି ।

ଦାରିଙ୍ଗବାଡି ଥାନା ଅଞ୍ଚଳ ଅତ୍ୟନ୍ତ ମାଓ ପ୍ରବଣ ହୋଇଥିବା ବେଳେ ଏହି ବନ୍ଧୁକ କାରଖାନା ଜଙ୍ଗଲ ମଧ୍ୟରେ ମିଳିବା ପୋଲିସର ଚିନ୍ତା ବଢାଇ ଦେଇଛି । ତିଆରି ହେଉଥିବା ବନ୍ଧୁକ କାହାକୁ କାହାକୁ ବିକ୍ରି କରାଯାଇଛି, ସେ ଦିଗରେ ପୋଲିସ ଅଧିକ ତଦନ୍ତ ଜାରିରଖିଛି । ବିଶେଷକରି ମାଓ ସଂଗଠନକୁ ବନ୍ଧୁକ ଯୋଗାଉଥିଲେ କି ନାହିଁ ତାହାର ତଦନ୍ତ ଚାଲିଛି ବୋଲି ଥାନା ଅଧିକାରୀ ଅଲେଖ ଗରଡିଆ ସୂଚନା ଦେଇଛନ୍ତି ।

କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ