ଫୁଲବାଣୀ: ରାଜ୍ୟରେ ବଢିଚାଲିଛି ମହାମାରୀ କୋରୋନାର ସଂକ୍ରମଣ । କୋରୋନାକୁ ପ୍ରତିହତ କରିବା ପାଇଁ ବିଭିନ୍ନ ଜିଲ୍ଲା ପରି କନ୍ଧମାଳରେ ମଧ୍ୟ ସାପ୍ତାହିକ ସଟଡାଉନ କରାଯାଇଛି । ଶନିବାର ଓ ରବିବାର ଦୁଇ ଦିନ ସମ୍ପୂର୍ଣ୍ଣ ଜିଲ୍ଲା ସଟଡାଉନ ରହୁଥିବାବେଳେ ଏହି ସମୟରେ ଅସହାୟ ଲୋକଙ୍କ ଦୁର୍ଦ୍ଦଶା ବଢିଯାଇଛି । ମୁଠାଏ ଖାଦ୍ୟ ପାଇଁ ସହରସାରା ଘୁରି ବୁଲୁଛନ୍ତି ଏମାନେ ।
ଫୁଲବାଣୀ ସମେତ ବାଲିଗୁଡା, ରାଇକିଆ, ଦାରିଙ୍ଗବାଡି, ତୁମୁଡିବନ୍ଧ, କୋଟଗଡ, ଟିକାବାଲି ଆଦି ଅଞ୍ଚଳରେ ସଟଡାଉନର ସମ୍ପୂର୍ଣ୍ଣ ପ୍ରଭାବ ପଡିଛି । ରାସ୍ତାଘାଟ ସବୁ ଶୂନଶାନ ହୋଇପଡିଥିବାବେଳେ ଦୋକାନ ବଜାର ଓ ହୋଟେଲ ସବୁ ବନ୍ଦ ରହିଛି । ଫଳରେ ରାସ୍ତାରେ ବୁଲିଥିବା ନିଃସହାୟ ଲୋକେ ଖାଦ୍ୟ ଅଭାବରୁ ଅସୁବିଧାର ସମ୍ମୁଖିନ ହେଉଥିବା ଦେଖିବାକୁ ମିଳୁଛି । ଏମାନଙ୍କ ପେଟକୁ ମୁଠାଏ ଦାନା ପାଇଁ କେହି ମଧ୍ୟ ଆଗକୁ ଆସୁନାହାନ୍ତି । ଜିଲ୍ଲାରେ ଶତାଧିକ ଅସହାୟ ଭୋକିଲା ପେଟେରେ ଏପରି ଘୁରି ବୁଲୁଛନ୍ତି । ଲକଡାଉନରେ ଦିଆଯାଉଥିବା ସୁବିଧା ଏହି ଅସହାୟ ଲୋକଙ୍କୁ ଯୋଗାଇ ଦେବାକୁ ଦାବି କରିଛନ୍ତି ସ୍ବେଛାସେବୀ ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
