ଫୁଲବାଣୀ: କନ୍ଧମାଳ ଜିଲ୍ଲାରେ ଅତ୍ୟଧିକ ଶୀତର ଲହରୀ ଦେଖିବାକୁ ମିଳିଛି । ପ୍ରକୃତିର ଅପରୂପ ସୌନ୍ଦର୍ଯ୍ୟ ସକାଳ ଓ ସନ୍ଧ୍ୟାକୁ ବିମୋହିତ କରୁଛି । ଶୀତକୁ ପ୍ରତିହତ କରିବାକୁ ଫୁଲବାଣୀ କରୋନେସନ ପଡ଼ିଆରେ ପ୍ରାତ ଭ୍ରମଣ, ବ୍ୟାୟାମ, ଯୋଗ ଆଦି ଦେଖିବାକୁ ମିଳିଲାଣି । ବିଶେଷ କରି ମହିଳା ଓ ଯୁବତୀମାନଙ୍କ ଭିଡ ବେଶି ଦେଖିବାକୁ ମିଳିଛି ।
କନ୍ଧମାଳରେ ଖସୁଛି ପାରଦ: ମନମୋହୁଛି କାକର ଛିଟା, ପାର୍କରେ ଜମୁଛି ଭିଡ
ଫୁଲବାଣୀ ସହରରେ ତଥା ଆଖପାଖ ଅଞ୍ଚଳରେ ଅତ୍ୟଧିକ ଶୀତ ଅନୁଭୁତ ହେଉଛି । ରାତିରେ ପାରଦ ହ୍ରାସ ପାଉଥିବାରୁ ଶୀତର ମାତ୍ରା ଧିରେ ଧିରେ ବଢ଼ୁଛି । ଓଡିଶାର କାଶ୍ମୀର କୁହାଯାଉଥିବା ଦାରିଙ୍ଗବାଡି ଅଞ୍ଚଳରେ ମଧ୍ୟ ପ୍ରବଳ ଥଣ୍ଡା ଅନୁଭୁତ ହେଲାଣି । ଶୀତ ସକାଳରେ ପୁଲକିତ ହୋଇ ଉଠିଛି ପ୍ରକୃତିରାଣୀ । କନ୍ଧମାଳ ଜିଲ୍ଲାରେ କୁହୁଡିର ଘନ ଆସ୍ତରଣ ଥିବାରୁ ଜିଲ୍ଲାର ରୂପ ଲାବଣ୍ୟ ବୃଦ୍ଧି ପାଇଛି ।