ଭବାନୀପାଟଣା: କଳାହାଣ୍ଡିରେ ଚାଞ୍ଚଲ୍ୟ । ମହିଳାଙ୍କ ଦେହରେ ନିଆଁ ଲଗାଇ ଜୀଅନ୍ତା ଜାଳି ଦିଆଯାଇଥିବା ଅଭିଯୋଗ । ଜୁନାଗଡ଼ ଥାନା ଅନ୍ତର୍ଗତ ଚିଚେଇଗୁଡ଼ା ଗ୍ରାମରୁ ଏଭଳି ଅଭାବନୀୟ ଘଟଣା ସାମ୍ନାକୁ ଆସିଛି । ତେବେ ମୃତ ମହିଳା ଜଣକ ଉକ୍ତ ଗ୍ରାମର ପଦ୍ମାବତୀ ମେହେର ବୋଲି ଜଣାପଡିଛି । ଏନେଇ ଖବର ପାଇ ଘଟଣାସ୍ଥଳରେ ଜୁନାଗଡ଼ ପୋଲିସ ପହଞ୍ଚି ତଦନ୍ତ କରିଛି ।
ସୂଚନା ମୁତାବକ, ମୃତ ମହିଳାଙ୍କ ସ୍ୱାମୀ ଦାମୋଦର ମେହେରଙ୍କ ପୂର୍ବରୁ ମୃତ୍ୟୁ ହୋଇଥିବା ବେଳେ ତାଙ୍କର ଏକମାତ୍ର ପୁଅ ପ୍ରତ୍ୟୁଷ ମେହେର ହାଇଦ୍ରାବାଦରେ ଚାକିରି କରୁଛନ୍ତି । ତେଣୁ ମହିଳା ଜଣକ ଚିଚେଇଗୁଡ଼ା ଗ୍ରାମରେ ଥିବା ତାଙ୍କ ଘରେ ଏକୁଟିଆ ରହିଆସୁଥିଲେ । ଶନିବାର ରାତିରେ ସେ ଶୋଇଥିବା ସମୟରେ କେହି ଜଣେ ଦୁର୍ବୃତ୍ତ ତାଙ୍କୁ ନିଆଁ ଲଗାଇ ଦେଇ ହତ୍ୟା କରିଥିଲେ । ଏନେଇ ତାଙ୍କ ଭାଇ ବଳରାମ ମେହେର ଅଭିଯୋଗ ଆଣିଛନ୍ତି । ତେବେ ପାରିବାରିକ କଳହକୁ ନେଇ ଏହି ହତ୍ୟାକାଣ୍ଡ ହୋଇଥିବା ସେ ସନ୍ଦେହ କରିଛନ୍ତି ।
ସେହିପରି ମୃତ ମହିଳାଙ୍କ ଘର କବାଟ ଆଗ ପଟରେ ତାଲା ଝୁଲୁଥିବା ଓ ଘର ଭିତରେ ତାଙ୍କ ମୃତଦେହ ବାହାରିବା ଘଟଣା ସାଧାରଣରେ ଚର୍ଚ୍ଚାର ବିଷୟ ହୋଇଛି । ଏନେଇ ଖବର ପାଇ ଜୁନାଗଡ଼ ପୋଲିସ ଏବଂ ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହ ଅପମୃତ୍ୟୁ ମାମଲା ରୁଜୁ କରିଛି । ତେବେ ପୋଲିସ ଏହି ହତ୍ୟାକାଣ୍ଡକୁ ଆତ୍ମହତ୍ୟା ରୂପ ଦେବାକୁ ଉଦ୍ୟମ କରୁଥିବା ସାଧାରଣରେ ଅଭିଯୋଗ ହୋଇଛି । ତେଣୁ ଏହି ଘଟଣାର ଉଚ୍ଚସ୍ତରୀୟ ତଥା କ୍ରାଇମବ୍ରାଞ୍ଚ ତଦନ୍ତ ପାଇଁ ଦାବି କରିଛନ୍ତି ଗ୍ରାମବାସୀ ।