ଭବାନୀପାଟଣା: ଶୀତରେ ଅସ୍ତବ୍ୟସ୍ତ କଳାହାଣ୍ଡିବାସୀ । ଖସୁଛି ପାରଦ ବଢୁଛି ଜାଡ । ଦିନକୁ ଦିନ ଖସିବାରେ ଲାଗିଛି ପାରଦ । ଗତ ସପ୍ତାହେ ଧରି ଜିଲ୍ଲାରେ ତାପମାତ୍ରା 8 ଡ଼ିଗ୍ରୀ ରହୁଥିବା ବେଳେ ହଠାତ ତାହା 5 ଡ଼ିଗ୍ରୀକୁ ଖସିଛି । ଫଳରେ କାଠୁଆ ଜାଡରେ ଅସ୍ତବ୍ୟସ୍ତ ହୋଇ ପଡିଛି ଜନ ଜୀବନ । ଖାଲି ମଣିଷ ନୁହେଁ ପଶୁମାନେ ମଧ୍ୟ ଏଥିପାଇଁ ହୋଇଛନ୍ତି ପ୍ରଭାବିତ ।
ଅନ୍ୟପଟେ ସାରା ରାଜ୍ୟରେ ଶୀତର ଲହରୀ ଜାରି ରହିଥିବା ବେଳେ ଜୀବନ ଯାତ୍ରାକୁ କରିଛି ପ୍ରଭାବିତ । ଆଉ ଏଥିରେ ପ୍ରଭାବିତ ହୋଇଛି କଳାହାଣ୍ଡି ଜିଲ୍ଲା । ସନ୍ଧ୍ୟା ହେଲେ ରାସ୍ତା ଘାଟ ଓ ବଜାର ସବୁ କିଛି ହୋଇ ଯାଉଛି ଶୂନଶାନ । ଯେଉଁଠି ଦେଖିଲେ ଲୋକେ ଶୀତରୁ ରକ୍ଷା ପାଇବା ପାଇଁ ନିଆଁ ଜାଳି ବସିଛନ୍ତି ତ ଆଉ କେଉଁଠି ଜମୁଛି ଚା ଖଟିର ଆସର । ସକାଳ ସମୟରେ ମର୍ଣ୍ଣିଂ ଓ୍ବାର୍କ ଏବଂ ବ୍ୟାୟାମ ପାଇଁ କାଁ ଭାଁ ଲୋକେ ବାହାରକୁ ବାହାରୁଛନ୍ତି । ଆଉ ଦିନ ତମାମ ବହୁଛି କୋହଲା ପବନ । ତେବେ ହଠାତ ତାପମାତ୍ରା କମିଥିବାରୁ ଲୋକେ ନିଜକୁ ଖାପ ଖୁଆଇ ପାରୁ ନାହାନ୍ତି । ରାତିରେ ବସ ଯାତ୍ରା କରୁଥିବା ଲୋକେ ହୁଅନ୍ତୁ କିମ୍ବା ରାତ୍ରି ଜଗୁଆଳି ଏମାନଙ୍କୁ ଜାଡ ଦେଉଛି କଷ୍ଟ ।