ଭବାନୀପାଟଣା:ଗ୍ରାମାଞ୍ଚଳର ବିକାଶ ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ବିଭିନ୍ନ ଯୋଜନା ମାଧ୍ୟମରେ କିପରି ଉପାନ୍ତ ଅଞ୍ଚଳ ଗୁଡିକର ବିକାଶ ହୋଇପାରିବ ସେନେଇ ଯୋଜାନ ପରେ ଯୋଜନା ପ୍ରଣୟନ କରୁଛନ୍ତି । କିନ୍ତୁ ଆଜି ମଧ୍ୟ ଉପାନ୍ତ ଅଞ୍ଚଳରେ ଅପହଞ୍ଚ ସରକାରୀ ଯୋଜନା । ଶିକ୍ଷା, ସ୍ବାସ୍ଥ୍ୟ, ଗମନାଗମନ ଓ ପାନୀୟ ଜଳ ଭଳି ମୌଳିକ ସୁବିଧାରୁ ବଞ୍ଚିତ ହେଉଛନ୍ତି ଲୋକେ । ଫଳରେ ଆଜିର ଦିନରେ ମଧ୍ୟ ଅଭିଶପ୍ତ ଜୀବନ ବଞ୍ଚିବାକୁ ପଡୁଛି । ଆମେ କହୁଛୁ କଳାହାଣ୍ଡି ଜିଲ୍ଲା ଆଦିବାସୀ ଅଧ୍ୟୁଷିତ ଥୁଆମୂଳ ରାମପୁର ବ୍ଲକ ଉପାନ୍ତ ଇଲାକା ବିଲାମାଲ ଗାଁର କଥା ।
ଏହି ଗାଁରେ ବସବାସ କରନ୍ତି ପ୍ରାୟ ୨୫୦ ପରିବାର । ହେଲେ ଆଜିବି ମୌଳିକ ସୁବିଧାରୁ ବଞ୍ଚିତ ଏଠାକାର ଲୋକେ । ଗମନାଗମନ, ରାସ୍ତାଘାଟ, ଶିକ୍ଷା, ପାନୀୟ ଜଳ, ବିଦ୍ୟୁତ ସେବାରୁ ବଞ୍ଚିତ ଗ୍ରାମବାସୀ । ଏହି ଗ୍ରାମକୁ ଯିବାକୁ ହେଲେ ପାରି ହେବାକୁ ପଡେ ଦୁଇଟି ପାହାଡ଼ । ଆବଡାଖାବଡା ପଥର ରାସ୍ତା ଦେଇ ୫ କିଲୋମିଟର ପାଦରେ ଚାଲି ଚାଲି କିମ୍ବା ବହୁ କଷ୍ଟରେ ବାଇକ ଯୋଗେ ଗଲେ ପଡେ ବିଲାମାଲ ଗାଁ । ଆଉ ଗାଁକୁ ଦେଖିଲେ ଲାଗେ ସତେ ଯେମିତି ଅଭିଶପ୍ତ ଜୀବନ ବିତାଉଛନ୍ତି ଗ୍ରାମବାସୀ ।
ଗାଁକୁ ଭଲ ରାସ୍ତାଟିଏ ନଥିବା ବେଳେ ଆମ୍ବୁଲାନ୍ସଟିଏ ମଧ୍ୟ ପହଞ୍ଚିପାରେ ନାହିଁ । ଫଳରେ ସେ ଗର୍ଭବତୀ ହେଉ ଅବା ସାଧାରଣ ରୋଗୀକୁ ଖଟିଆରେ ବୋହି ୧୨ କିଲୋମିଟର ରାୟଗଡ଼ା ଜିଲ୍ଲା କଲ୍ୟାଣିସିଂପୁର ମେଡିକାଲକୁ ଚିକିତ୍ସା ସେବା ପାଇଁ ନେଇଥାନ୍ତି ଗ୍ରାମବାସୀ । କେବଳ ଯେ ରାସ୍ତାର ସମସ୍ୟା ତାହା ନୁହେଁ ଗାଁରେ ଆଜି ପର୍ଯ୍ୟନ୍ତ ନଳକୂପ ଟିଏ ମଧ୍ୟ ନାହିଁ ଫଳରେ ଦୂଷିତ ପାଣି ପିଇ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଗ୍ରାମବାସୀ । ସକାଳ ହେଲେ କାଖରେ ଗରା ଓ ମାଠିଆ ଧରି ଗାଁ ଠାରୁ ୨ କିଲୋମିଟର ଦୂରରେ ଥିବା ପଥର କଡ଼ରୁ ପାଣି ସଂଗ୍ରହ କରିବା ପାଇଁ ମହିଳାଙ୍କ ଲମ୍ବା ଲାଇନ ଲାଗିଥାଏ ।