କଳାହାଣ୍ଡି: ଘଞ୍ଚ ଜଙ୍ଗଲ ଭିତରେ କଟୁଛି ଜୀବନ । ନା ଅଛି ରାସ୍ତା, ନା ଆଲୁଅର ବ୍ୟବସ୍ଥା। ବର୍ଷାଦିନେ 4ମାସ ପାଇଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଏ ଗାଁ । ପ୍ରତିବର୍ଷ ହାତୀ ନଦୀରେ ବନ୍ୟା ଆସି ଆଦିବାସୀଙ୍କ ସର୍ବସ୍ବଃ ଉଜାଡି ଦିଏ ।
୩୮ ବର୍ଷର ଜଙ୍ଗଲୀ ଜୀବନ
ଆଉ ଏସବୁ ମଧ୍ୟରେ ଦୀର୍ଘ ୩୮ବର୍ଷ ଧରି ସରକାରୀ ଯୋଜନା କାର୍ଯ୍ୟକାରୀ ଆଶାରେ ଜଙ୍ଗଲରେ ସଂଘର୍ଷମୟ ଜୀବନ କାଟୁଛନ୍ତି କଳାହାଣ୍ଡିର ଜୟନ୍ତପୁର ଗ୍ରାମବାସୀ । ଜୟନ୍ତପୁର ଯିବାକୁ ହେଲେ କେସିଙ୍ଗା ବ୍ଲକରୁ ୭ କିମି ପାଦଚଲା ଜଙ୍ଗଲ ରାସ୍ତା ଦେଇ ଯିବାକୁ ପଡେ । ଆଉ ଗାଁ କହିଲେ ଏଠାରେ ରହୁଥିବା ଦୁଇଟି ପରିବାରକୁ ବୁଝାଏ । ସେପଟେ ମୌଳିକ ସୁବିଧାରୁ ବଞ୍ଚିତ ହୋଇ ଏହି ଗାଁର 35 ଟି ପରିବାର ମଧ୍ୟରୁ 33 ପରିବାର ଭିଟାମାଟି ଛାଡି ଅନ୍ୟତ୍ର ରହୁଛନ୍ତି ।
୧୯୮୧ ମସିହାରେ ପୂର୍ବତନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକ କେସିଙ୍ଗା ବ୍ଲକ କାନ୍ତେଶୀର ଗ୍ରାମପଞ୍ଚାୟତ ବଜରଗଡ ଜଙ୍ଗଲରେ ଉଦଘାଟନ କରିଥିଲେ ଜୟନ୍ତପୁର 'ସମନ୍ବିତ ଗୃହ ନିର୍ମାଣ ଯୋଜନା' । ଯାହା ଏହି ଫଳକ ବେଶ ବୟାନ କରୁଛି ।