ଭବାନୀପାଟଣା : ପୁଣି ଦୁଇ ଦାଦନ ଶ୍ରମିକଙ୍କ ମୃତ୍ୟୁ ଘଟିଛି । ଗାଁକୁ ଫେରିଲା ଦୁଇ ଦାଦନ ଶ୍ରମିକଙ୍କ ମୃତ ଶରୀର । ଶୋକାକୁଳ ପରିବେଶ ମଧ୍ୟରେ ହେଲା ଦୁହିଁଙ୍କ ଅନ୍ତିମ ସଂସ୍କାର । ଗୋଟିଏ ଜୁଇରେ ଜଳିଲା ଦୁଇଟି ମୃତଦେହ । ଏଭଳି ଏକ ଦୁଃଖଦପୁର୍ଣ୍ଣ ଘଟଣା ଅଞ୍ଚଳବାସୀଙ୍କୁ ମର୍ମାହତ କରିଛି ।
ସୂଚନା ଅନୁଯାୟୀ କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ବ୍ଲକ ଗୋପିନାଥପୁର ଗ୍ରାମ ପଞ୍ଚାୟତ ଅନ୍ତର୍ଗତ ପେରଗୁନି ପଡାର ଦୁଇ ଆଦିବାସୀ ଯୁବକ ମନୋହର ମାଝୀ ଓ ଉପେନ୍ଦ୍ର ମାଝୀ ଉଭୟେ ହାଇଦ୍ରାବାଦର କୁମ୍ପୁଲିରେ ଥିବା ଫେଆର୍ ଫିଲଡ ନାମକ ଏକ ଘରୋଇ କନଷ୍ଟ୍ରକସନ୍ କମ୍ପାନୀରେ କାମ କରୁଥିବା ବେଳେ ମଙ୍ଗଳବାର ସକାଳ ପ୍ରାୟ ୧୧ ଟା ସମୟର ଦୁର୍ଘଟଣାର ଶିକାର ହୋଇଥିଲା । ଦୁହିଁଙ୍କ ଉପରେ ଓଲଟି ପଡିଥିଲା ଏକ ଲୁହାଛଡ ବୋଝେଇ ଟ୍ରଲି ଏବଂ ଘଟଣାସ୍ଥଳରେ ଦୁହିଁଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଏହି ଘଟଣାରେ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
