କଳାହାଣ୍ଡି: ବଦଳୁନି କଳାହାଣ୍ଡିବାସୀଙ୍କ ଜୀବନ ଶୈଳୀ । ଆଜି ପୁଣି ଥରେ ଖଟିଆରେ ବୁହା ହେଲା ମୃତଦେହ । ଜିଲ୍ଲା ମଦନପୁର ରାମପୁର ବ୍ଲକର ବାଗବିଲା ଗାଁ ଦେଖିବାକୁ ମିଳିଥିଲା ଏଭଳି ଘଟଣା । ଗାଁକୁ ରାସ୍ତା ନଥିବାରୁ ଅଧ ବାଟରେ ଅଟକି ରହିଲା ଆମ୍ବୁଲାନ୍ସ । ଫଳରେ ବାଧ୍ୟ ହୋଇ ପାହାଡି ରାସ୍ତାରେ ମୃତ ଦେହକୁ ଖଟିଆରେ କାନ୍ଧେଇ 8 କିମି ଚାଲିଲେ ପରିଜନ ।
ଭିଡିଓ ସୌଜନ୍ୟ: ସମ୍ବାଦଦାତା, କଳାହାଣ୍ଡି
ସୂଚନାଯୋଗ୍ୟ, ଉକ୍ତ ଗାଁର ଜମୁନ୍ତି ମାଝୀ ଚାଷଜମିକୁ ଯିବା ସମୟରେ ହଠାତ ଖସି ପଡି ଆହତ ହୋଇଥିଲେ । ଏହାପରେ ବଲାଙ୍ଗୀର ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଥିଲେ ପରିବାର ଲୋକେ । କିନ୍ତୁ ଆଜି ମୃତ୍ୟୁ ଘୋଷଣା କରିଥିଲେ ଡାକ୍ତର । ଏହା ପରେ ଆମ୍ବୁଲାନ୍ସ ଯୋଗେ ମୃତ ଦେହକୁ ଗାଁକୁ ଅଣାଯାଇଥିବା ବେଳେ ରାସ୍ତା ନଥିବାରୁ ବଡେନସରା ଗାଁରୁ ଫେରିଯାଇଥିଲା ଗାଡି । ତେବେ ବଡେନସରାରୁ ବାଗବିଲା ଗାଁକୁ ପ୍ରାୟ 8 କିମିର ପାହିଡିଆ ରାସ୍ତାରେ ବାଧ୍ୟ ହୋଇ ଖଟିଆରେ ମର ଶରୀରକୁ ବୋହିଥିଲେ ପରିବାର ଲୋକେ ।