ଭବାନୀପାଟଣା: ଲୁହୁରା, ଲୋହାର, ଲହରା, କମାର ଓ ବିନ୍ଧାଣି ଜାତିକୁ ଆଦିବାସୀ ଜାତି ଭାବେ ମାନ୍ୟତା ଦେବା ତଥା ଓ ଜାତିର ସାମୂହିକ ବିକାଶ ପାଇଁ ଆବଶ୍ୟକ ପଦକ୍ଷେପ ନେବା ଦାବିରେ ଆଜି କଳାହାଣ୍ଡି ଜିଲ୍ଲା ଲୁହୁରା ସମାଜ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି। ରାଜ୍ୟରେ ବସବାସ କରୁଥିବା କମାର ବା ଲୁହୁରା ସମ୍ପ୍ରଦାୟଙ୍କ କୌଳିକ ବୃତ୍ତି ହେଲା ଲୁହାରେ ବିଭିନ୍ନ ସାମଗ୍ରୀ ତିଆରି କରି ବିକ୍ରି କରିବା । ରାଜ୍ୟରେ ଏମାନଙ୍କ ସଂଖ୍ୟା ହେଲା ୧୨ ଲକ୍ଷ । ଅନ୍ୟମାନଙ୍କ ଅପେକ୍ଷା ଏମାନେ ସାମାଜିକ ଶିକ୍ଷା ଓ ଆର୍ଥିକ କ୍ଷେତ୍ରରେ ବହୁତ ପଛୁଆ ।
ଏହି ଲୁହୁରା ସମ୍ପ୍ରଦାୟକୁ ଅନ୍ୟ ଝାରଖଣ୍ଡ, ପଶ୍ଚିମବଙ୍ଗ ଓ ବିହାର ଆଦି ରାଜ୍ୟ ମାନଙ୍କରେ ସରକାର ଆଦିବାସୀ ମାନ୍ୟତା ଦେଇଥିବା ବେଳେ ବର୍ତ୍ତମାନ ଯାଏଁ ଓଡ଼ିଶାରେ ବସବାସ କରୁଥିବା ଲୁହୁରା ସଂପ୍ରଦାୟଙ୍କୁ ଏହି ମାନ୍ୟତା ମିଳି ପାରିନାହିଁ। ଯଥାଶୀଘ୍ର ରାଜ୍ୟ ସରକାର ଲୁହୁରାମାନଙ୍କୁ ଆଦିବାସୀ ମାନ୍ୟତା ଦାବିରେ ଆଜି କଳାହାଣ୍ଡି ଜିଲ୍ଲା ଲୁହୁରା ସମାଜ ପକ୍ଷରୁ ଧର୍ମଗଡ଼ଠାରେ ଏକ ବିଶାଳ ଶୋଭାଯାତ୍ରାରେ ବାହାରି ଉପ ଜିଲ୍ଲାପାଳଙ୍କ କାର୍ଯ୍ୟାଳୟଠାରେ ବିକ୍ଷୋଭ ପ୍ରଦର୍ଶନ କରାଯାଇଛି । ଏହା ସହ ରାଜ୍ୟ ସରକାରଙ୍କ ଉଦ୍ଦେଶ୍ୟରେ ଉପ ଜିଲ୍ଲାପାଳଙ୍କ ଜରିଆରେ ଦାବିପତ୍ର ପ୍ରଦାନ କରିଛନ୍ତି ।