ଭବାନୀପାଟଣା: କଳାହାଣ୍ଡି ଥୁଆମୂଳ ରାମପୁର ବ୍ଲକର ଦୁର୍ଗମ ଇନ୍ଦ୍ରାବତୀ ଜଳବନ୍ଦୀ ଅଞ୍ଚଳରେ ଦେଖା ଦେଇଛି ପୁଣି ଜନନୀ ଯନ୍ତ୍ରଣାର ବିକଳ ଚିତ୍ର । ଖଟିଆରେ ବୁହା ହେଲେ ଗର୍ଭବତୀ । ଜଳବନ୍ଦୀ ଅଞ୍ଚଳ ଭାବେ ପରିଚିତ ପୋଡ଼ାପଦର ଗ୍ରାମ ପଞ୍ଚାୟତର ତେନ୍ତୁଳିପଦର ଗ୍ରାମର ରାବେଣା ନାଏକଙ୍କ ସ୍ତ୍ରୀ ଗର୍ଭବତୀ ରେବତୀ ନାଏକଙ୍କୁ ପ୍ରସବ ଯନ୍ତ୍ରଣା ହୋଇଥିଲା । ରେବତୀ ନାଏକଙ୍କୁ ଡାକ୍ତରଖାନା ନେବା ପାଇଁ କୌଣସି ସାଧନ ନଥିବା ହେତୁ ପରିବାର ଲୋକେ ତାଙ୍କୁ ଖଟିଆ ସାହାଯ୍ୟରେ ବୋଟ୍ ପର୍ଯ୍ୟନ୍ତ ବୋହି ନେଇଥିଲେ । ଇନ୍ଦ୍ରାବତୀ ଜଳଭଣ୍ଡାର ଆରପଟରୁ ଆସିଥିବା ବୋଟ୍ ଆମ୍ବୁଲାନ୍ସ ସାହାଯ୍ୟରେ ରେବତୀଙ୍କୁ ନବରଙ୍ଗପୁର ତେନ୍ତୁଳି ଖୁଣ୍ଟି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଛି ।
ସେଠାରେ ତାଙ୍କର ଏକ ଶିଶୁ ପୁତ୍ର ଜନ୍ମ ଲାଭ କରିଥିବା ସୂଚନା ମିଳିଛି । ଇନ୍ଦ୍ରାବତୀ ଜଳବନ୍ଦୀ ପୋଡ଼ାପଦର ଗ୍ରାମ ପଞ୍ଚାୟତବାସୀଙ୍କ ପାଇଁ ଏଭଳି ଘଟଣା କିଛି ନୂଆ ନୁହେଁ । ହେଲେ ଏଭଳି ସାଂଘାତିକ ସମସ୍ୟାର ଅନ୍ତ ଘଟିବାରେ ଆଉ କେତେଦିନ ଲାଗିବ ଏବେବି ବଡ଼ ପ୍ରଶ୍ନ ହୋଇ ରହିଯାଇଛି ଜଳବନ୍ଦୀ ଅଞ୍ଚଳବାସୀଙ୍କ ପାଇଁ । ଏହି ଦୁର୍ଗମ ଅଞ୍ଚଳକୁ ଗମନାଗମନର ସ୍ଥାୟୀ ବ୍ୟବସ୍ଥା ନଥିବା ବେଳେ ଏକ ମାତ୍ର ସାଧନ ପାଲଟିଛି ବୋଟ । କେବଳ ସ୍ୱାସ୍ଥ୍ୟ ସମସ୍ୟା ନୁହେଁ ଏଠାରେ ଶିକ୍ଷା ଓ ଅନ୍ୟାନ କାର୍ଯ୍ୟ ମଧ୍ୟ ଲୋକଙ୍କୁ ଜଳଭଣ୍ଡାର ପାର ହେବାକୁ ପଡ଼ିଛି । ସାହାରା ପାଲଟିଛି ଇନ୍ଦ୍ରାବତୀ ଜଳଭଣ୍ଡାରରେ ପଡ଼ିଥିବା ବୋଟ । ତେବେ ଗାଁକୁ ରାସ୍ତା ତିଆରି କରିବା ପାଇଁ କେ ଚେପଟାଘାଟ ଏବଂ ପୋଡ଼ାପଦର ପଞ୍ଚାୟତର ମଧ୍ୟରେ ଥିବା ଗୋଲାଗାଡ଼ ନଦୀ ଉପରେ ଏକ ପୋଲ ନିର୍ମାଣର ଶିଳାନ୍ୟାସ ହୋଇଛି । ହେଲେ ଶିଳାନ୍ୟାସକୁ ୪ ବର୍ଷ ଉପରେ ବିତିଯାଇଥିଲେ ମଧ୍ୟ ପୋଲ ହୋଇପାରି ନଥିବା ଗ୍ରାମବାସୀ ଅଭିଯୋଗ କରିଛନ୍ତି ।
ଏହା ମଧ୍ୟ ପଢନ୍ତୁ....ଗାଁ ବିକାଶର ଆସଲି ଚିତ୍ର, ଖଟିଆରେ 8 କିମି ବୁହାହେଲେ ମ୍ୟାଲେରିଆ ରୋଗୀ