ଭବାନୀପାଟଣା: ନିୟମଗିରି ସୁରକ୍ଷା ଓ ଅଞ୍ଚଳବାସୀଙ୍କ ପାଇଁ ସଂଗ୍ରାମ କରୁଥିବା ସୁରକ୍ଷା ସମିତିର ସଂଗଠନରେ ଫାଟ ସୃଷ୍ଟି କରିବା ଓ ବଦନାମ କରିବା ଉଦ୍ଦେଶ୍ୟରେ କିଛି ଖଳବ୍ୟକ୍ତି ଉଦ୍ୟମ କରୁଛନ୍ତି ବୋଲି ସୁରକ୍ଷା ସମିତିର ଉପଦେଷ୍ଟା ଲିଙ୍ଗରାଜ ଆଜାଦ ଅଭିଯୋଗ କରିଛନ୍ତି । ଭବାନୀପାଟଣା ଠାରେ ଆୟୋଜିତ ସାମ୍ବାଦିକ ସମ୍ମିଳନୀରେ ନିୟମଗିରି ସୁରକ୍ଷା ସମିତିର ଉପଦେଷ୍ଟା ଲିଙ୍ଗରାଜ ଆଜାଦ କହିଛନ୍ତି ।
ସେ କହିଛନ୍ତି ଯେ, ଗତ କୋରୋନା ମହାମାରୀ ସମୟରେ ନିୟମଗିରି ଅଞ୍ଚଳରେ ଡଙ୍ଗରିଆଙ୍କ ସୁରକ୍ଷା ପାଇଁ କିଛି ସହଯୋଗ ଏବଂ ଅଭିଜ୍ଞ ଡାକ୍ତରଙ୍କୁ ନେଇ ନିୟମଗିରିରେ କୋରୋନା ସଚେତନତା ସୃଷ୍ଟି କରାଯାଇଥିଲା । ସେମାନେ ଗୋଷ୍ଠୀ ହୋଇ ବସବାସ କରୁଥିବାରୁ କୋରୋନା ସଂକ୍ରମଣ ହେଲେ ଅସମ୍ଭାଳ ସ୍ଥିତି ଉପୁଜିବାର ଆଶଙ୍କା ଥିବାରୁ ସମିତି ପକ୍ଷରୁ ଏହି କାର୍ଯ୍ୟକ୍ରମ ହାତକୁ ନିଆଯାଇଥିଲା । ତେବେ ଉକ୍ତ ବିଷୟକୁ କେନ୍ଦ୍ର କରି ରାୟଗଡା ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଏକ ପୋଷ୍ଟର ମରାଯାଇଥିଲା । ସଚେତନ ଡଙ୍ଗରିଆ ଯୁବ ପରିଷଦ ନିୟମଗିରି ସୁରକ୍ଷା ସମିତି ନାମରେ ଉକ୍ତ ପୋଷ୍ଟର ମରାଯାଇ ଥିବାବେଳେ ଏଥିରେ କୋରୋନା ଚିକିତ୍ସା ଆଳରେ ଅର୍ଥ ସଂଗ୍ରହ କରାଯାଇଥିବା ଦର୍ଶାଇବା ସହ ସମିତିର ସଦସ୍ୟ ଲେଲିନ କୁମାରଙ୍କ ବ୍ୟାଙ୍କ ଆକାଉଣ୍ଟ ନମ୍ବର ଓ ଅନ୍ୟ ତଥ୍ୟ ଦିଆଯାଇଛି ।