କଳାହାଣ୍ଡିରେ ଲଜ୍ଜା, ପାଞ୍ଚ ବର୍ଷର ଶିଶୁକନ୍ୟା ସହ ଦୁଷ୍କର୍ମ

ପାଞ୍ଚ ବର୍ଷର ଶିଶୁକନ୍ୟାକୁ ଦୁଷ୍କର୍ମ ଅଭିଯୋଗରେ 48 ବର୍ଷୀୟ ବ୍ୟକ୍ତି ଗିରଫ । ଅଧିକ ପଢନ୍ତୁ

ଭବାନୀପାଟଣା:କଳାହାଣ୍ଡିରେ ଲଜ୍ଜାଜନକ ଘଟଣା । ସୀମା ଟପୁଛି ପାଶବିକତା, ମାନବିକତା ହରାଉଛି ମନୁଷ୍ୟ । 5 ବର୍ଷର ଶିଶୁ କନ୍ୟାକୁ ଦୁଷ୍କର୍ମ କଲା 48 ବର୍ଷୀୟ ବ୍ୟକ୍ତି । ମୂର୍ତ୍ତି ବିସର୍ଜନ କରିବାକୁ ନଦୀକୁ ଯାଇଥିବା ବେଳେ ଏକ ଜଙ୍ଗଲକୁ ଟେକି ନେଇ ଶିଶୁ କନ୍ୟାକୁ ଦୁଷ୍କର୍ମ କଲା ଅଭିଯୁକ୍ତ । ଏନେଇ ଥାନାରେ ଅଭିଯୋଗ ପରେ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ମଦନପୁର ରାମପୁର ଥାନା ଅଞ୍ଚଳରେ ଏହି ଘଟଣା ଘଟିଥିବା ଜଣାପଡିଛି। ଗିରଫ ଅଭିଯୁକ୍ତ ହେଉଛି ୪୮ ବର୍ଷୀୟ ଉଗ୍ରସେନ ଭୋଇ ।

ମିଳିଥିବା ସୂଚନା ଅନୁଯାୟୀ, ଅଭିଯୁକ୍ତର ଘର ପୀଡିତାଙ୍କ ଘର ପାଖରେ । ନିଜ ଘର ପାଖରେ ଦୋକାନ ଖଣ୍ଡିଏ କରି ରୁହେ ଉଗ୍ରସେନ ଭୋଇ। ତାର ନଜର ସବୁଦିନ ରହିଥିଲା ପୀଡିତାଙ୍କ ଉପରେ ଅନେକ ସମୟରେ ତାଙ୍କୁ ଦୋକାନକୁ ଡାକି ଚକୋଲେଟ ଦେଇଥାଏ ଅଭିଯୁକ୍ତ ଜଣକ । ତେବେ ପୀଡିତା ଜଣଙ୍କ ତାଙ୍କ ବାପାଙ୍କ ସହ ବିଶ୍ବକର୍ମା ମୂର୍ତ୍ତି ବିସର୍ଜନ କରିବାକୁ ପାଣିଘାଟକୁ ଯାଇଥିବା ବେଳେ ଏହି ସମୟରେ ତାଙ୍କୁ ଉଠାଇନେଇ ପାଖରେ ଥିବା ଏକ ଜଙ୍ଗଲକୁ ନେଇ ଯାଇଥିଲା ଉଗ୍ରସେନ ଭୋଇ । ସେଠାରେ ଶିଶୁକନ୍ୟାକୁ ଦୁଷ୍କର୍ମ କରିବା ପରେ ଘଟଣାସ୍ଥଳରୁ ଫେରାର ହୋଇଯାଇଥିଲା ଅଭିଯୁକ୍ତ ।

ଶିଶୁକନ୍ୟାର କାନ୍ଦ ଶୁଣି ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ତାଙ୍କୁ ଘରକୁ ଆଣିଥିଲେ। ପରିବାର ଲୋକେ ଝିଅ ସହ ଦୁଷ୍କର୍ମ ହୋଇଥିବା ଜାଣିପାରି ହସ୍ପିଟାଲରେ ଭର୍ତ୍ତି କରିଥିଲେ । ଏନେଇ ପରିବାର ପକ୍ଷରୁ ମଦନପୁର ରାମପୁର ଥାନାରେ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରି ଅଭିଯୁକ୍ତକୁ ଗିରଫ କରିଛି । ଏହାପରେ ଅଭିଯୁକ୍ତ ଉଗ୍ରସେନ ଭୋଇକୁ ପୋଲିସ କୋର୍ଟ ଚାଲାଣ କରିଥିବା ଜଣାପଡ଼ିଛି ।

ଗତ ଜାନୁଆରୀ ମାସରେ ପୁରୀ ଜିଲ୍ଲାରେ ଜଣେ ଦିବ୍ୟାଙ୍ଗ ନାବାଳିକାଙ୍କୁ ଦୁଷ୍କର୍ମ ହୋଇଥିବା ଅଭିଯୋଗ ସାମ୍ନାକୁ ଆସିଥିଲା। ଘଟଣାରେ ପୀଡ଼ିତାଙ୍କ ବଡବାପାଙ୍କ ପୁଅକୁ ପୋଲିସ ଅଟକ ରଖିଥିଲା । ପୁରୀ ଜିଲ୍ଲା ଅସ୍ତରଙ୍ଗରେ ବି ଏଭଳି ଅଭାବନୀୟ ଘଟଣା ଘଟିଥିଲା । ଅସ୍ତରଙ୍ଗ ବ୍ଲକର ଜଣେ 15 ବର୍ଷର ଦିବ୍ୟାଙ୍ଗ ଝିଅ ମୋବାଇଲ ଦେଖୁଥିବା ସମୟରେ ଚାରିଜଣ ଯୁବକ ବଳପୂର୍ବକ ଉଠାଇ ନେଇ ଦୁଷ୍କର୍ମ କରିଥିବା ଲିଖିତ ଅଭିଯୋଗ ଆଣିଥିଲେ ପୀଡିତାଙ୍କ ମାଆ । ଅଭିଯୋଗ ପରେ ଅସ୍ତରଙ୍ଗ ପୋଲିସ ଜଣଙ୍କୁ ଅଟକ ରଖି ପଚରାଉଚରା କରିଥିଲା।

ଇଟିଭି ଭାରତ, କଳାହାଣ୍ଡି