ଭବାନୀପାଟଣା: ଜଙ୍ଗଲରୁ ମିଳିଲା ନାବାଳିକାର ମୃତଦେହ । କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ଅନ୍ତର୍ଗତ ମୋହନଗିରୀ ଗାଁ ନିକଟରେ ଥିବା ଜଙ୍ଗଲରୁ ଜଣେ ନାବାଳିକା ଝିଅର ଝୁଲନ୍ତା ଗଳିତ ମୃତଦେହକୁ ଉଦ୍ଧାର କରିଛି ପୋଲିସ । ସୂଚନା ଅନୁଯାୟୀ ମୋହନଗିରି ଗାଁର ନାବାଳିକା ମନୀଷା ନାଏକ ୧୭ ତାରିଖ ଦିନ ଦ୍ବିପ୍ରହରରେ ଘରେ ଖାଇ ସାରିବା ପରେ କୌଣସି କାମରେ ଗାଁ ମୁଣ୍ଡକୁ ଯାଇଥିଲେ ।
ହେଲେ ଦୀର୍ଘ ସମୟ ଧରି ସେ ଆଉ ଘରକୁ ଫେରିନଥିଲେ । ଏନେଇ ପରିବାର ଲୋକେ ଖୋଜାଖୋଜି କରିଥିଲେ । ହେଲେ ଝିଅକୁ ପାଇନଥିଲେ । ଶେଷରେ ଏନେଇ ଥାନାରେ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା । ଝିଅ ନିଖୋଜ ହେବାର ୪ ଦିନ ପରେ ଅର୍ଥାତ ବୁଧବାର ଗାଁ ନିକଟସ୍ଥ ଜଙ୍ଗଲରେ କିଛି ସ୍ଥାନୀୟ ଗାଈ ଚରାଳି ଝୁଲନ୍ତା ମୃତଦେହ ଦେଖି ଗ୍ରାମବାସୀ ଓ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଉଦ୍ଧାର କରିଥିଲା ।