ଭବାନୀପାଟଣା: ଦାନ ମାଝୀ, ଦିନେ ନିଜ ସ୍ତ୍ରୀର ଶବକୁ କାନ୍ଧେଇ ବେଶ ଚର୍ଚ୍ଚାକୁ ଆସିଥିଲେ । ଅନେକ କାରଣରୁ ସେ ଖବରର ଶିରୋନାମା ପାଲଟିଥିଲେ । କେତେବେଳେ ତୃତୀୟ ବିବାହକୁ ନେଇ ତ ପୁଣି କେତେବେଳେ ଗାଡ଼ି କିଣାକୁ ନେଇ । ତେବେ ଗତ ଦୁଇ ବର୍ଷ ମଧ୍ୟରେ ଦାନଙ୍କ ନିକଟକୁ ସରକାରୀ ଓ ବେସରକାରୀ ସ୍ତରରୁ ଆସିଛି ଲକ୍ଷାଧିକ ଟଙ୍କାର ସହାୟତା ରାଶି । ଏହା ମଧ୍ୟରେ ବଦଳିଛି ଦାନଙ୍କ ଜୀବନ ଶୈଳୀ । 3 ଝିଅ ଏବେ ଭୁବନେଶ୍ବରର ଏକ ପ୍ରତିଷ୍ଠିତ କଲେଜରେ ଶିକ୍ଷା ଗ୍ରହଣ ମଧ୍ୟ କରୁଛନ୍ତି ।
ଭିଡିଓ ସୌଜନ୍ୟ: ସମ୍ବାଦଦାତା, କଳାହାଣ୍ଡି
ଦାନ ମାଝୀଙ୍କ ଶବବୁହା ଘଟଣାର 2 ବର୍ଷ ପରେ ମେଲଘରା ଗାଁର ସ୍ଥିତି ପରଖିବାକୁ ପହଞ୍ଚିଥିଲା ଇଟିଭି ଭାରତ । ଗାଁରେ ପ୍ରବେଶ ମାତ୍ରକେ ଆମେ ଦେଖିଥିଲୁ ଦାନ ମାଝୀ ନିଜ ଘର ତିଆରିରେ ବ୍ୟସ୍ତ । ପ୍ରଶାସନ 4 ଡିସିମିଲି ଜମି ଦେବା ସହିତ ଇନ୍ଦିରା ଆବାସ ଯୋଜନାରେ ତାଙ୍କୁ ସାମିଲ କରିଛି । ତେବେ ଦାନଙ୍କ ପାଇଁ ଚର୍ଚ୍ଚାକୁ ଆସିଥିବା ମେଲଘର ଗାଁର ଅବସ୍ଥା ଯଥା ପୂର୍ବଂ, ତଥା ପରଂ ଭଳି । ଆଜିବି ସେହିଭଳି ଅବହେଳିତ ଅବସ୍ଥାରେ ରହିଛି ମେଲଘର ।