ଭବାନୀପାଟଣା: ଆସନ୍ତାକାଲି ଅର୍ଥାତ ସେପ୍ଟେମ୍ବର ୭ ତାରିଖ ଦିନ ୧୨ ଘଣ୍ଟିଆ କୋଶଳ ବନ୍ଦ ଡାକରା ଦେଇଛି କୋଶଳ ରାଜ୍ୟ ମୁକ୍ତି ମୋର୍ଚ୍ଚା (koshal rajya mukti morcha called for koshal bandh) । ପଶ୍ଚିମ ଓଡ଼ିଶାରେ ହାଇକୋର୍ଟ ବେଞ୍ଚ ପ୍ରତିଷ୍ଠା ସହିତ ସ୍ବତନ୍ତ୍ର କୋଶଳ ରାଜ୍ୟ ମାନ୍ୟତା ଦାବିରେ ଏହି ବନ୍ଦ ଡାକରା ଦିଆଯାଇଛି । କୋଶଳ ରାଜ୍ୟ ମୁକ୍ତି ମୋର୍ଚ୍ଚା ଓ କୋଶଳ ସେନା ମିଳିତ ଭାବରେ ଏହି ଆନ୍ଦୋଳନର ଡାକରା ଦେଇଛନ୍ତି ।
ତେଜୁଛି ସ୍ବତନ୍ତ୍ର କୋଶଳ ରାଜ୍ୟ ଗଠନ ଦାବି, ଆସନ୍ତାକାଲି ୧୨ ଘଣ୍ଟିଆ କୋଶଳ ବନ୍ଦ ଦୀର୍ଘ ବର୍ଷ ଧରି ପଶ୍ଚିମ ଓଡିଶା ତଥା କେବିକେ ଅଞ୍ଚଳ (କଳାହାଣ୍ଡି, ବଲାଙ୍ଗୀର, କନ୍ଧମାଳ) କୁ ମିଶାଇ ସ୍ବତନ୍ତ୍ର କୋଶଳ ରାଜ୍ୟ ମାନ୍ୟତା ଦାବି କରି ଆସୁଛନ୍ତି କୋଶଳ ରାଜ୍ୟ ମୁକ୍ତି ମୋର୍ଚ୍ଚା ଓ କୋଶଳ ସେନା । ବିଭିନ୍ନ ସମୟରେ ଆନ୍ଦୋଳନ କରିବା ସହ ବନ୍ଦ ଡାକରା ଦେଇ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ଠାରେ ଦାବି ଉପସ୍ଥାପନ କରାଯାଉଛି । କିନ୍ତୁ ସରକାର ଏଥିପ୍ରତି କୌଣସି ପଦକ୍ଷେପ ଗ୍ରହଣ କରୁନଥିବା ନେଇ କୋଶଳ ରାଜ୍ୟ ମୁକ୍ତି ମୋର୍ଚ୍ଚା ସଭାପତି ସାଗର ଚରଣ ଦାସ ଅଭିଯୋଗ କରିଛନ୍ତି ।
ଏହା ମଧ୍ୟ ପଢ଼ନ୍ତୁ...ସେପ୍ଟେମ୍ବର ୭ରେ କୋଶଳ ସେନା ପକ୍ଷରୁ ପଶ୍ଚିମ ଓଡ଼ିଶା ବନ୍ଦ ଡାକରା
ହାଇକୋର୍ଟ ବେଞ୍ଚ ପ୍ରସଙ୍ଗଠାରୁ ଆରମ୍ଭ କରି ପଶ୍ଚିମ ଓଡିଶା ବିକାଶ ପରିଷଦ ମୁଖ୍ୟ କାର୍ଯ୍ୟାଳୟକୁ ପଶ୍ଚିମ ଓଡ଼ିଶାରେ ସ୍ଥାପନ ଓ ପଶ୍ଚିମ ଓଡିଶା ସହ କେବିକେ (କଳାହାଣ୍ଡି, ବଲାଙ୍ଗୀର, କନ୍ଧମାଳ) ଅଞ୍ଚଳକୁ ମିଶାଇ ଏକ ସ୍ବତନ୍ତ୍ର କୋଶଳ ରାଜ୍ୟ ମାନ୍ୟତା ଦାବିରେ ଆସନ୍ତାକାଲି ଅର୍ଥାତ ସେପ୍ଟେମ୍ବର ୭ ତାରିଖ ଦିନ ୧୨ ଘଣ୍ଟିଆ କୋଶଳ ମହାବନ୍ଦ (koshal mahabandh) ଡାକରା ଦିଆଯାଇଛି । କୋଶଳ ରାଜ୍ୟ ମୁକ୍ତି ମୋର୍ଚ୍ଚା ଓ କୋଶଳ ସେନା ମିଳିତ ଭାବରେ ଏହି ବନ୍ଦରେ ସାମିଲ ହେବେ । କୋଶଳାଞ୍ଚଳର ସମସ୍ତ ସାମାଜିକ ସଙ୍ଗଠନ, ଓକିଲ ସଙ୍ଘ ଓ ବଣିକ ସଙ୍ଘ ସହଯୋଗ କରିବା ପାଇଁ ନିଷ୍ପତ୍ତି ନିଆଯାଇଛି ।
ସେହିପରି ଏହି ବନ୍ଦରେ ସମସ୍ତ ସରକାରୀ ଓ ବେସରକାରୀ ଶିକ୍ଷାନୁଷ୍ଠାନ, ସରକାରୀ ଓ ବେସରକାରୀ କାର୍ଯ୍ୟାଳୟ, ଦୋକାନ ବଜାର ବନ୍ଦ ରହିବ । କେବଳ ଜରୁରୀକାଳୀନ ସେବାକୁ ଏହି ବନ୍ଦରୁ ବାଦ ଦିଆଯିବା ନେଇ ନିଷ୍ପତ୍ତି ହୋଇଛି । ବରିଷ୍ଠ କୋଶଳ କ୍ରାନ୍ତିକାରୀ ନେତା ବାଳଗୋପାଳ ମିଶ୍ର ଓ ଯୁବ ନେତା ତଥା କୋଶଳ ରାଜ୍ୟ ମୁକ୍ତି ମୋର୍ଚ୍ଚା ସଭାପତି ସାଗର ଚରଣ ଦାସ ସମସ୍ତ କୋଶଳବାସୀଙ୍କୁ ଏଥିରେ ସାମିଲ ହେବାକୁ ଆହ୍ବାନ କରିଛନ୍ତି । ସଭାପତି ସାଗର ଚରଣ ଦାସ କହିଛନ୍ତି, "ଗତ ଜୁଲାଇ ୫ ତାରିଖରେ ଆମେ ବିଧାନ ସଭା ଘେରାଉ କରିବା ସହ ରାଜ୍ୟ ସରକାରଙ୍କୁ ଦାବିପତ୍ର ଦେଇଥିଲୁ । ଆଶା ମଧ୍ଯ କରିଥିଲୁ ସରକାର ଆମର ଦାବି ନେଇ କିଛି ପଦକ୍ଷେପ ନେବେ । କିନ୍ତୁ ଦୁଃଖର କଥା ଆମକୁ ସମ୍ପୂର୍ଣ୍ଣ ଅଣଦେଖା କରାଯାଉଛି । ତେବେ ଆମର ଦାବି ପୂରଣ ପାଇଁ ଆମେ ଏହି ବନ୍ଦ ଡାକରା ଦେଇଛୁ ।"
ଇଟିଭି ଭାରତ, କଳାହାଣ୍ଡି
