ପୁଣି ଦାଦନ ଦୁଃଖ, ରୋଜଗାର ପାଇଁ ଯାଇଥିଲେ ଗାଁକୁ ଫେରିଲା ମୃତଦେହ

ଆନ୍ଧ୍ରପ୍ରଦେଶକୁ ଦାଦନ ଖଟିବାକୁ ଯାଇଥିବା କଳାହାଣ୍ଡି ଜିଲ୍ଲାର କୋକସରା ବ୍ଲକ ଅନ୍ତର୍ଗତ କାଶିବାହାଲ ଗ୍ରାମର ମାନସିଂ ପୋଢଙ୍କ ମୃତ୍ୟୁ ଘଟିଛି । ଅଧିକ ପଢନ୍ତୁ

ଭବାନୀପାଟଣା:ରାଜ୍ୟରେ ପୁଣି ଦାଦନ ଦୁଃଖ । ପରିବାର ଚଳାଇବା ପାଇଁ ଟଙ୍କା ରୋଜଗାର ଆଶାରେ ଆନ୍ଧ୍ରପ୍ରଦେଶ ଯାଇଥିଲେ । ହେଲେ ଘରକୁ ଫେରିଛି ମୃତଦେହ । ଏଭଳି ଏକ ଅଭାବନୀୟ ଘଟଣା ଘଟିଛି କଳାହାଣ୍ଡି ଜିଲ୍ଲାର କୋକସରା ବ୍ଲକ ଅନ୍ତର୍ଗତ କାଶିବାହାଲ ଗ୍ରାମରେ । କାମ କରୁଥିବା ବେଳେ ଛାତରୁ ପଡି ମାନସିଂ ପୋଢଙ୍କ ମୃତ୍ୟୁ ଘଟିଥିବା ବେଳେ ଏହାକୁ ନେଇ ଗ୍ରାମରେ ଶୋକାକୂଳ ପରିବେଶ ସୃଷ୍ଟି ହୋଇଛି ।

ସୂଚନା ଅନୁଯାୟୀ, କାଶିବାହାଲର ଗାଁର ମାନସିଂ ପୋଢ ପରିବାର ପ୍ରତିପୋଷଣ କରିବା ପାଇଁ ଏକ ବର୍ଷ ତଳେ ଗାଁର ଆଉ କିଛି ଯୁବକଙ୍କ ସହ ମିଶି ଆନ୍ଧ୍ରପ୍ରଦେଶକୁ ଦାଦନ ଖଟିବା ପାଇଁ ଯାଇଥିଲେ । ସେଠାରେ ସେ ଏକ ଠିକା ସଂସ୍ଥାରେ ଶ୍ରମିକ ଭାବରେ କାମ କରିବା ସହ ଦୁଇ ପଇସା ରୋଜଗାର କରି ପରିବାର ଚଳାଇବା ପାଇଁ ଟଙ୍କା ମଧ୍ୟ ପଠାଇ ଆସୁଥିଲେ । ହେଲେ ହଠାତ୍‌ ଗତକାଲି କାମ କରୁଥିବା ବେଳେ ଛାତରୁ ଖସି ପଡ଼ିଥିଲେ । ଫଳରେ ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା । ପରେ ସାଥୀ ଶ୍ରମିକ ଏନେଇ ମୃତ ଦାଦନ ଶ୍ରମିକଙ୍କ ପରିବାରକୁ ଖବର ଦେବା ସହ ଠିକା ସଂସ୍ଥା ମାଲିକଙ୍କୁ ମଧ୍ୟ ସୂଚନା ଦେଇଥିଲେ ।

ପରେ ଠିକା ସଂସ୍ଥା ପକ୍ଷରୁ ଶ୍ରମିକଙ୍କ ମୃତଦେହ ଗାଁକୁ ପଠାଇ ଦିଆଯାଇଛି । ଆଉ ଗାଁରେ ମୃତଦେହ ପହଞ୍ଚିବା ପରେ ଶୋକାକୁଳ ପରିବେଶ ହୋଇଥିବା ବେଳେ କାନ୍ଦବୋବାଳିରେ ଗାଁ ଦାଣ୍ଡ ଫାଟି ପଡୁଛି । ପରିବାରର ଏକ ମାତ୍ର ରୋଜଗାରିଆ ବ୍ୟକ୍ତିକୁ ହରାଇ ଭାଙ୍ଗି ପଡ଼ିଛି ପୁରା ପରିବାର ।

ତେବେ କଳାହାଣ୍ଡି ଜିଲ୍ଲାର ମୁଖ୍ୟ ସମସ୍ୟା ସାଜିଛି ଦାଦନ ଶ୍ରମିକ । ଦାଦନକୁ ରୋକିବା ପାଇଁ ସରକାର ଅନେକ ଯୋଜନା କରୁଥିବା ବେଳେ ସବୁ ଫେଲ୍‌ ମାରିଛି । କାମ ପାଇଁ ଘରଛାଡି ଯାଇଥିବା ପୁଅ ଆଉ ଫେରିନି । ଦାଦନ ଦୁଃଖ ଦୂର କରିବା ପାଇଁ ସରକାରଙ୍କ ଆନେକ ଯୋଜନା କରୁଛନ୍ତି । ହେଲେ କେତେକାଞ୍ଚଳରେ ଯୋଜନାର ସଠିକ ବିନିଯୋଗ ହୋଇପାରୁ ନାହିଁ । ଫଳରେ ରାଜ୍ୟ ଛାଡି ହଜାର ହଜାର ଶ୍ରମିକ ଦାଦନ ଖଟିବାକୁ ବାହାର ରାଜ୍ୟକୁ ଯାଉଛନ୍ତି । ହେଲେ ଏଥିପ୍ରତି ନାଁ ଜିଲ୍ଲା ପ୍ରଶାସନ ପଦକ୍ଷେପ ନେଉଛି ନାଁ ସରକାର । ଯାହାକୁ ନେଇ ଅସନ୍ତୋଷ ବୃଦ୍ଧି ପାଉଛି ।

ଇଟିଭି ଭାରତ, କଳାହାଣ୍ଡି