କଳାହାଣ୍ଡି: ଗୋଟିଏ ପଟେ ରାଜ୍ୟ ସରକାର ରାଜ୍ୟବାସୀଙ୍କୁ ଉତ୍ତମ ଶାସନ ଓ ସୁବିଧା ଦେବାକୁ ଆରମ୍ଭ କରିଛନ୍ତି ‘ମୋ ସରକାର’ ଯୋଜନା । ଯାହାରି ମାଧ୍ୟମରେ ଖୋଦ ରାଜ୍ୟ ମୁଖିଆ ଜନତାଙ୍କ ସମସ୍ୟା ବୁଝିବେ । ଆଉ ପ୍ରାଥମିକତା ଭିତ୍ତିରେ ଥାନା ଓ ଡାକ୍ତରଖାନାକୁ ଏହି ଯୋଜନାରେ ସାମିଲ କରାଯାଇଛି । ହେଲେ ରାଜ୍ୟରେ ପୋଲିସ ବାବୁ କେମିତି ଦେଉଛନ୍ତି ସେବା ଓ ଲୁଟୁଛନ୍ତି ଟଙ୍କା ଏହି ଗୋଟିଏ ଘଟଣାରୁ ସ୍ପଷ୍ଟ ଅନୁମେୟ ।
ଭିଡିଓ ସୌଜନ୍ୟ: ସମ୍ବାଦଦାତା, କଳାହାଣ୍ଡି ଘଟଣାଟି ହେଉଛି କଳାହାଣ୍ଡି ଜିଲ୍ଲା କଲମପୁର ବ୍ଳକ ମିନଗୁର ପଞ୍ଚାୟତ ଭଁଇରି ଗାଁର । ଘଟଣା 18 ଅଗଷ୍ଟ 2019ର ଭଁଇରି ଗ୍ରାମର ଏକ ଘରୁ ଜଣେ ଯୁବକଙ୍କ ଝୁଳନ୍ତା ମୃତଦେହ ଜୟପାଟଣା ପୋଲିସ ଉଦ୍ଧାର କରିଥିଲା। ମୃତ ଯୁବକଙ୍କ ମା' ଶରଧା ନାଏକ ହତ୍ୟା ଅଭିଯୋଗ ଆଣି କୁଟୁରୁ ଫାଣ୍ଡିରେ ଅଭିଯୋଗ କରିଥିଲେ। ପୋଲିସ କିଛିଲୋକଙ୍କୁ ଆଣି ପଚରା ଉଚୁରା କରି ଛାଡିଦେଇଥିଲା ଏଥିରେ ନିରାଶ ହୋଇ ଶରଧା ନାଏକ ଜିଲ୍ଲା ଆରକ୍ଷୀ ଅଧିକ୍ଷକଙ୍କୁ ସାକ୍ଷାତ କରି ଲିଖିତ ଅଭିଯୋଗ କରିଥିଲେ । ଏସପିଙ୍କ ନିର୍ଦ୍ଦେଶରେ ଘଟଣାର ପୁଣିଥରେ ତଦନ୍ତ କରିଥିଲା କୁଟୁରୁ ପୋଲିସ । ପରେ ମିଳିତ ଭାବେ କୁଟୁରୁ ପୋଲିସ ଓ ଜୟପାଟଣା ପୋଲିସ ମିନଗୁର ଗାଁର 2ଜଣ ବାପ ପୁଅ ଶଙ୍କର ରଣା ଓ ନିରାକାର ରଣା ଙ୍କୁ ଏହି ହାତ୍ୟାକାଣ୍ଡର ଅଭିଯୋଗ ଦର୍ଶାଇ ଗିରଫ କରି କୋର୍ଟ ଚାଳଣା କରିଥିଲା ।
ଏହିଠାରୁ ଆରମ୍ଭ ହୋଇଥିଲା ପୋଲିସର ଅସଲ ଚରିତ୍ର । ଗିରଫ ହୋଇଥିବା ବ୍ୟକ୍ତିଙ୍କ ପରିବାରର ଅଭିଯୋଗ ଅନୁଯାୟୀ ଜଣେ ନିର୍ଦିଷ୍ଟ ଗ୍ରାମରକ୍ଷୀ କୁଆଡେ ଦଫାରେ କହୋଳ କରିବା ସହ କେମିତି ଶୀଘ୍ର ଅଭିଯୁକ୍ତ ବାହାରକୁ ଆସିବେ ସେ ଦାୟିତ୍ବ ନେଇଥିଲେ । ଆଉ କାମ ପାଇଁ ଅଭିଯୁକ୍ତଙ୍କ ପରିବାର ପାଖରୁ 55ହଜାର ଟଙ୍କା ମଧ୍ୟ ଗ୍ରାମରକ୍ଷୀ ନେଇଛନ୍ତି । ପରବର୍ତ୍ତୀ ଅବସ୍ଥାରେ କାମ ନହେବାରୁ ଅଭିଯୁକ୍ତଙ୍କ ପରିବାର ବର୍ଗ ଫାଣ୍ଡିକୁ ଆସି ଅଭିଯୋଗ କଲା ପରେ ଘଟଣାଟି ସାମନାକୁ ଆସିଛି ।
ଅଭିଯୁକ୍ତଙ୍କ ପରିବାର ବର୍ଗ ଏବେ ଗ୍ରାମରକ୍ଷୀଙ୍କ ନା ରେ ଅଭିଯୋଗ କରିବା ସହ ମାମଲା ଦାୟର କରିଛନ୍ତି । ଆଉ ଗ୍ରାମରକ୍ଷୀ ସିଧା ସିଧା ଅଭିଯୋଗ କରିଛନ୍ତି ଫାଣ୍ଡି ଅଧିକାରୀ ବିରୋଧରେ । ଏହାସହ ଏତଲା ମଧ୍ୟ ଦେଇଛନ୍ତି । ଏବେ କିଏ ଠିକ ଥାନା ଅଧିକାରୀ ନା ଗ୍ରାମରକ୍ଷୀ ତାକୁ ନେଇ ଉଠିଛି ପ୍ରଶ୍ନ । ଜଣେ ବୃଦ୍ଧା ମା ନିଜ ପୁଅକୁ ହରାଇ ନ୍ୟାୟ ମାଗୁଥିବା ବେଳେ ପୋଲିସ ଅଧିକାରୀଙ୍କ ଏପରି କାରନାମାକୁ ନେଇ ସାରା ରାଜ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଏଠି ପ୍ରଶ୍ନ ଉଠୁଛି ଫାଣ୍ଡି ଅଧିକାରୀ କହିଥିଲେ କି ଗ୍ରାମରକ୍ଷୀଙ୍କୁ ଲାଞ୍ଚ ଆଣିବାକୁ । ନା ଗ୍ରାମରକ୍ଷୀ ନିଜେ ନିଜେ ଏତେ ବଡ ସାହାସ କରିଥିଲେ । ଜଣେ ଗ୍ରାମରକ୍ଷୀ ଏଥିରେ ଏକା ସାମିଲ ଥିବା ସନ୍ଦେହ । ତେବେ ଏହି ଘଟଣାରେ ପୋଲିସ ଉପରିସ୍ଥ ଅଧିକାରୀ କି ପଦକ୍ଷେପ ନେଉଛନ୍ତି , ମୁଖ୍ୟମନ୍ତ୍ରୀ କେଉଁ ଢଙ୍ଗରେ ଏଠି ମୋ ସରକାରକୁ ପରିଚାଳନା କରୁଛନ୍ତି ତାକୁ ଅପେକ୍ଷା ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
