ପ୍ରଦୂଷଣମୁକ୍ତ ନାରା ନେଇ ସାଇକେଲରେ ଭାରତ ଭ୍ରମଣ

ପ୍ରଦୂଷଣମୁକ୍ତ ନାରା ନେଇ ସାଇକେଲରେ ଭାରତ ଭ୍ରମଣ। ସାଇକେଲ ଯୋଗେ ସାରା ଭାରତ ଭ୍ରମଣ କରିଲେ ଯୁବକ । ଅଧିକ ପଢ଼ନ୍ତୁ

ଭବାନୀପାଟଣା : ପ୍ରଦୂଷଣମୁକ୍ତ ନାରା ନେଇ ସାଇକେଲରେ ଭାରତ ଭ୍ରମଣ । ଜଙ୍ଗଲକୁ ସୁରକ୍ଷା ଦେବା ବୃକ୍ଷରୋପଣ କରି ନିଜ ଅଞ୍ଚଳକୁ ସ୍ୱଚ୍ଛ ପରିମଳ ରଖିବା ଆଦି ସଚେତନତାର ବାର୍ତ୍ତା ନେଇ ଜଣେ ଯୁବକ ସାଇକେଲ ଭାରତ ଭ୍ରମଣରେ ବାହାରିଛନ୍ତି । ଯୁବକ ଜଣକ କୋଲକାତାର ସୁଦୀପ ଦାସ ବୋଲି ଜଣା ପଡ଼ିଛି ।

କୋଲକତାର ଯାଦବପୁର ଅଞ୍ଚଳର ସୁଦୀପ ଦାସ ପ୍ରଦୂଷଣ ମୁକ୍ତ ଭାରତ ନାରା ନେଇ ଗତ ନଭେମ୍ବର ୨୪ ତାରିଖରୁ ସାଇକେଲ ଯୋଗେ ଭାରତ ଭ୍ରମଣ ପାଇଁ ବାହାରିଛନ୍ତି । ଆଜି(ବୁଧବାର) ସୁଦୀପ ଭବାନୀପାଟଣାରେ ପହଞ୍ଚିଥିଲେ । ଭବାନୀପାଟଣାରେ ପହଞ୍ଚିବା ପରେ ଉତ୍ତର ବନଖଣ୍ଡ ପକ୍ଷରୁ ସମସ୍ତ ବନକର୍ମଚାରୀ ସାମିଲ ହୋଇ ତାଙ୍କୁ ଭବ୍ୟ ସ୍ବାଗତ ଜଣାଇବା ସହ ସମ୍ବର୍ଦ୍ଧନା ଦେଇଛନ୍ତି ।

ଏହି ଅବସରରେ ସୁଦୀପ କହିଥିଲେ ସାରା ଭାରତ ବର୍ଷରେ ଜଙ୍ଗଲ କ୍ଷୟ ହେବାରେ ଲାଗିଛି । ଅନେକ ଜଙ୍ଗଲ ସମ୍ପଦ ନଷ୍ଟ ହେବାରୁ ଜଳବାୟୁ ପ୍ରଦୂଷିତ ହେବାକୁ ଲାଗିଲାଣି । ଫଳରେ ମଣିଷଠାରୁ ଆରମ୍ଭ କରି ଜୀବଜନ୍ତୁ ସମସ୍ତ ଗୋଟିଏ ପ୍ରକାରର ଅଣନିଶ୍ୱାସ ହେଉଛନ୍ତି। ଏଭଳି ସ୍ଥିତି ଲାଗି ରହିଲେ ନିଶ୍ୱାସ ନେବା ମଧ୍ୟ ଗୋଟିଏ ସମୟରେ ବେଶ କଷ୍ଟକର ହୋଇପଡ଼ିବ।

ତେଣୁ ଜଙ୍ଗଲକୁ ସୁରକ୍ଷା ଦେବା ବୃକ୍ଷରୋପଣ କରି ନିଜ ଅଞ୍ଚଳକୁ ସ୍ୱଚ୍ଛ ପରିମଳ ରଖିବା ପ୍ରତ୍ୟେକ ଲୋକଙ୍କ କର୍ତ୍ତବ୍ୟ । ତେଣୁ ଭାରତକୁ ପ୍ରଦୂଷଣମୁକ୍ତ କରିବା ପାଇଁ ସେ ଏଭଳି ସାଇକେଲ ଯୋଗେ ସାରା ଭାରତର ପ୍ରତ୍ୟେକଟି ସହରକୁ ଯାଇ ଲୋକଙ୍କୁ ସଚେତନ କରିବେ ବୋଲି କହିଥିଲେ । ଏହାସହ ସୁଦୀପ ଭବାନୀପାଟଣାରୁ ବାହାରି କୋରାପୁଟ ଦେଇ ବିଶାଖାପାଟଣା ଓ ପରେ ତେଲେଙ୍ଗାନା ଅଞ୍ଚଳକୁ ଯାଇ ଲୋକଙ୍କୁ ସଚେତନ କରିବେ ବୋଲି କହିଛନ୍ତି ।

ଏ ସମ୍ପର୍କରେ ସୁଦୀପ କହିଛନ୍ତି "ଯଦି ଆପଣ ଗଛ କାଟୁଛନ୍ତି ତେବେ ପରବର୍ତ୍ତୀ ମୂହୁର୍ତ୍ତରେ ସେଠାରେ ଏକ ଗଛ ଲଗାନ୍ତୁ । କାରଣ ଗଛ ବଞ୍ଚିଲେ ଆମେ ବଞ୍ଚିବା । ଏହାଦ୍ବାରା ଆମେ ବି ସୁସ୍ଥ ରହିବା ଓ ପରିବେଶ ବି ସ୍ବଚ୍ଛ ରହିବ।"

ସେହିପରି କଳାହାଣ୍ଡିର ଉତ୍ତର ବନଖଣ୍ଡର ଅତିରିକ୍ତ ବନ ସଂରକ୍ଷଣ ଅଧିକାରୀ ଅନୁରାଗ ମିଶ୍ର କହିଛନ୍ତି ''ଗତ ତାରିଖରୁ କୋଲକତାର ସୁଦୀପ ଏକ ଭଲ ବାର୍ତ୍ତା ନେଇ ସାଇକେଲ ଯୋଗେ ଭ୍ରମଣ କରୁଛନ୍ତି । ସେ ଦେଖାଇଛନ୍ତି ଯେ ଆମ ପାଇଁ ଜଙ୍ଗଲ କେତେ ଆବଶ୍ୟକ । ଯେଉଁ ମାତ୍ରାରେ ପ୍ରଦୂଷଣ ବଢ଼ିଛି ତାହା କେତେ ଆମ ପାଇଁ ଓ ପରିବେଶ ପାଇଁ କ୍ଷତିକାରକ । ତେବେ ସୁଦୀପଙ୍କ ଭବାନୀପାଟଣା ଗସ୍ତ ଆମକୁ ପ୍ରେରଣା ଯୋଗାଇଛି । ତାଙ୍କର ଏହି ସଚେତନତା ଯାତ୍ରା କେବଳ ଭବାନୀପାଟଣା ପାଇଁ ନୁହେଁ ପୁରା ଓଡ଼ିଶାବାସୀଙ୍କ ପାଇଁ ଏକ ବଡ଼ ବାର୍ତ୍ତା ।''

ମଣିଷ ଯେଉଁ ପାରିପାର୍ଶ୍ବିକ ପରିବେଶରେ ରହୁଛି ଦିନକୁ ଦିନ ତାହା ପ୍ରଦୂଷିତ ହେବାରେ ଲାଗିଛି । ବର୍ତ୍ତମାନ ପ୍ରଦୂଷଣ ଚରମ ସୀମାରେ ପହଞ୍ଚିଲାଣି । ପ୍ରଦୂଷିତ ପରିବେଶରେ ନିଶ୍ବାସ ନେବା ଏକ ପ୍ରକାର ମୁସ୍କିଲ ହେଲାଣି । ବଞ୍ଚିବା ପାଇଁ ମଣିଷକୁ ଏକ ପ୍ରଦୂଷଣମୁକ୍ତ ପରିବେଶ ଅପରିହାର୍ଯ୍ୟ ।

ଇଟିଭି ଭାରତ, କଳାହାଣ୍ଡି