ଭବାନୀପାଟଣା:ଆକାଶରେ ମେଘର ମହ୍ଲାର ଝିପି ଝିପି ବର୍ଷା ସାଙ୍ଗକୁ ଘନ କୁହୁଡ଼ିର ଆସ୍ତରଣ ଜମିଛି । ଆଉ ଏହାସହ ବେଳେ ବେଳେ କୁଆପଥର ମାଡ଼ ହୋଇଛି । ଯାହାକି କାଶ୍ମୀରର ଚିତ୍ର ବୟାନ କରୁଥିବା ବେଳେ ଏହା ପ୍ରକୃତିପ୍ରେମୀଙ୍କୁ ବେଶ ଆକୃଷ୍ଟ କରୁଥିବା ଦେଖିବାକୁ ମିଳିଛି । ଗତ ୪ ଦିନ ହେବ ଜିଲ୍ଲାର ବିଭିନ୍ନ ସ୍ଥାନରେ କୁଆପଥର ମାଡ଼ ସହ ବର୍ଷା ଲାଗି ରହିଛି । ଫଳରେ ଘନ କୁହୁଡ଼ିର ଆସ୍ତରଣ ରେ ଢାଙ୍କି ହୋଇଛି ସମଗ୍ର ଅଞ୍ଚଳ ।
ଘନକୁହୁଡି ସାଙ୍ଗକୁ ତୁହାକୁ ତୁହା ବର୍ଷା ସହ କୁଆପଥର ମାଡ଼ ହେବା ଫଳରେ ପ୍ରବଳ ଥଣ୍ଡା ଅନୁଭୂତି ହେଉଛି। ଏଭଳି ପାଗ ଲାଗି ରହିବା ଫଳରେ ସାଧାରଣ ଜୀବନଯାତ୍ରା ପ୍ରଭାବିତ ହେବା ସହ ରାସ୍ତାଘାଟ ସବୁ ଖାଁ ଖାଁ ହୋଇଛି । ଲାଗି ରହିଥିବା ଘନ କୁହୁଡି ଯୋଗୁଁ ବିଭିନ୍ନ ସ୍ଥାନରେ ଦୁର୍ଘଟଣା ମଧ୍ୟ ବୃଦ୍ଧି ପାଇଛି । ଆଉ ଏହାର ପ୍ରତିକୂଳ ପ୍ରଭାବ ଚାଷବାସ ଉପରେ ମଧ୍ୟ ପଡିଛି । କୁଆପଥର ମାଡ଼ରେ ବ୍ୟାପକ ଭାବରେ ନଷ୍ଟ ହୋଇଛି ପନିପରିବା ଓ ଡାଲି ଜାତୀୟ ଫସଲ। ତେବେ କେତେ ପରିମାଣରେ କ୍ଷୟକ୍ଷତି ହୋଇଛି ତାହା କୃଷି ବିଭାଗର ଆକଳନ ପରେ ହିଁ ଜଣାପଡ଼ିବ ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
