ଭବାନୀପାଟଣା: କଳାହାଣ୍ଡି ଜିଲ୍ଲା କେଗାଁ ଥାନା ଟିଙ୍ଗିପଦର ଗାଁ ମୁଣ୍ଡ ଚାଷ ଜମିରୁ ଯୁବତୀଙ୍କ ଝୁଲନ୍ତା ମୃତଦେହ ଉଦ୍ଧାର କରିଥିଲା ପୋଲିସ । ମୃତ ଯୁବତୀ ଜଣକ ସେହି ଗାଁର ପ୍ରେମଶିଳା ମାଝୀ ବୋଲି ଜଣାପଡିଥିଲା । ପ୍ରେମଶିଳାଙ୍କୁ ତାଙ୍କ ପ୍ରେମିକ ଯୋଜନାବଦ୍ଧ ଭାବେ ହତ୍ୟା କରିଥିବା ପରିବାର ଲୋକେ ଅଭିଯୋଗ କରିଥିବାବେଳେ ଅଭିଯୁକ୍ତ ଫେରାର ରହିଥିବା ଜଣାପଡ଼ିଛି । ନ୍ୟାୟ ଦାବିରେ ମୃତଦେହକୁ ଅଭିଯୁକ୍ତ ପ୍ରେମିକର ଘରେ ରଖିଥିଲେ । ପ୍ରାୟ ୩୦ ଘଣ୍ଟା ପରେ ପ୍ରଶାସନର ହସ୍ତକ୍ଷେପ ପରେ ମୃତଦେହ ସଂସ୍କାର ପାଇଁ ଯାଇଥିବା ଜଣାପଡ଼ିଛି ।
ସୂଚନା ଅନୁଯାୟୀ ଟିଙ୍ଗିପଦର ଗାଁ ପ୍ରେମଶିଳା ମାଝୀ ଓ ସେହି ଗାଁର ସୁନିଲ ଦାସଙ୍କ ମଧ୍ୟରେ ଦୀର୍ଘ ଦିନ ଧରି ରହିଥିଲା ପ୍ରେମ ସମ୍ପର୍କ । ଉଭୟ ଏକାଠି ଜୀବନ ବିତାଇବା ପାଇଁ ନିଷ୍ପତ୍ତି ନେବାକୁ ଯାଇ ଗତ ଅଗଷ୍ଟ ମାସ ୧୮ ତାରିଖ ଦିନ ଘରୁ ଫେରାର ହୋଇଯାଇଥିଲେ । ତେବେ ଏନେଇ ପ୍ରେମଶିଳାଙ୍କ ବାପା ଯାଦବ ମାଝୀ କେଗାଁ ଥାନାରେ ଲିଖିତ ଅଭିଯୋଗ କରିଥିଲେ । ତେଣୁ ପୋଲିସ ଉଭୟ ପୁଅ ଓ ଝିଅର ପରିବାରକୁ ଡାକି ଥାନାରେ ଆପୋଷ ବୁଝାମଣା କରାଇଥିଲେ ।
ଏଥିସହ ଚଳିତ ନଭେମ୍ବର ମାସ ୯ ତାରିଖରେ କୋର୍ଟରେ ବିବାହ କରାଯିବା ପାଇଁ ସ୍ଥିର ହୋଇଥିଲା । ହେଲେ ୯ ତାରିଖ ବିଳମ୍ବିତ ରାତିରେ ପ୍ରେମଶିଳା ଏକୁଟିଆ ପ୍ରେମିକ ସୁନିଲ ଦାସଙ୍କ ଘରେ ପହଞ୍ଚିଥିଲା । ଏହାପରେ ୧୦ ତାରିଖ ଦିନ ପ୍ରେମିଶିଳାଙ୍କ ମୃତଦେହ ଗାଁ ମୁଣ୍ଡରେ ଥିବା ଚାଷ ଜମିରୁ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଥିଲା । ଖବର ପାଇ ମୃତ ପ୍ରେମିଶିଳାଙ୍କ ପରିବାର ଲୋକେ ଘଟଣାସ୍ଥଳରେ ପହଞ୍ଚି ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିଲା । ତେବେ ମୃତ ପ୍ରେମିଶିଳାର ବାପା ତାଙ୍କ ଝିଅକୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ନେଇ ପୋଲିସ ନିକଟରେ ଲିଖିତ ଅଭିଯୋଗ କରିଥିଲେ ।