ଭବାନୀପାଟଣା:ଉତ୍କେଲା ବିମାନ ବନ୍ଦରର ଉଦଘାଟନ ପରେ କଳାହାଣ୍ଡିବାସୀଙ୍କ ସ୍ୱପ୍ନ ପୂରଣ ହୋଇଛି । ଯାହାକୁ ନେଇ କଳାହାଣ୍ଡିବାସୀଙ୍କ ମନରେ ଉତ୍ସାହ ଦେଖିବାକୁ ମିଳିଛି । ତେବେ ରାଜଧାନୀ ଭୁବନେଶ୍ବରରୁ କଳାହାଣ୍ଡିକୁ ବର୍ତ୍ତମାନ ଅତି ସହଜରେ ଯୋଗାଯୋଗ କରିହେବ। ଘଣ୍ଟା ଘଣ୍ଟାର ବାଟ ବର୍ତ୍ତମାନ ମାତ୍ର 1 ଘଣ୍ଟା 10ମିନିଟରେ ଅତିକ୍ରମ କରିହେବ। ଏହି ଜିଲ୍ଲାରୁ ଆକାଶ ମାର୍ଗରେ ଯୋଗାଯୋଗର ସ୍ବପ୍ନ ପୂରଣ ହୋଇଛି ।
ଆଜି ଉଦଘାଟନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଉତ୍କେଲ ବିମାନ ବନ୍ଦରରେ ପ୍ରଥମ ଯାତ୍ରୀବାହି ବିମାନ ସଫଳତା ପୂର୍ବକ ପହଞ୍ଚିଛି। ଏହି ଐତିହାସିକ ଦୃଶ୍ୟ ଦେଖିବାକୁ ଆବାଳ ବୃଦ୍ଧ ବନିତା ଅପେକ୍ଷା କରି ରହିଥିଲେ। 9ଟି ସିଟ୍ ବିଶିଷ୍ଟ ଏହି ବିମାନ 9ଜଣ ଯାତ୍ରୀଙ୍କୁ ନେଇ ଉତ୍କେଲା ବିମାନ ବନ୍ଦରରେ ପହଞ୍ଚିବା ପରେ କଳାହାଣ୍ଡିବାସୀଙ୍କ ମଧ୍ୟରେ ଖୁସିର ଲହରୀ ଖେଳି ଯାଇଛି।
ବିକାଶର ଫର୍ଦ୍ଦରେ କଳାହାଣ୍ଡି ଯୋଡି ହୋଇଥିବାରୁ ସମସ୍ତେ ଖୁସି ଅନୁଭବ କରିଛନ୍ତି। ଏହାସହ ନୀଳ ସରାଫ ପ୍ରଥମ ଯାତ୍ରୀ ଭାବେ ବିମାନରେ ଯାତ୍ରା କରିବାର ସୁଯୋଗ ପାଇଥିବାରୁ ଖୁସି ଅନୁଭବ କରୁଥିବା କହିଛନ୍ତି। ଉତ୍କେଲା ବିମାନ ବନ୍ଦରରେ ଏନେଇ ଏକ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ କଳାହାଣ୍ଡି ସାଂସଦ ବସନ୍ତ ପଣ୍ଡା, ରାଜ୍ୟ ସଭା ସାଂସଦ ସୁଜିତ୍କୁମାର, ଜିଲ୍ଲାପାଳ , ଏସପି ଓ ସମସ୍ତ ବିଧାୟକମାନେ ଉପସ୍ଥିତ ରହିଥିଲେ।