ଭବାନୀପାଟଣା:ଖରା ବର୍ଷା ରୋଗ ପୋକ ସହ ଲଢି ବିଲରେ ସୁନାର ଫସଲ ଫଳାଏ ଚାଷୀ । ହେଲେ ଅମଳ ସମୟ ଆସିଲେ ଚାଷୀ ମନରେ ସରାଗ ଆସେ । କାହିକିଁନା ବର୍ଷ ଯାକର ମୂଲ ଚାଷୀ ଅମଳରୁ ହିଁ ପାଇଥାଏ । ହେଲେ ଏବେ ମଣ୍ତି ସମସ୍ୟା ଯୋଗୁଁ ଚାଷୀ ମୁଣ୍ତରେ ପଡିଛି ଚଡକ । ବର୍ଷଯାକର ଫସଲ ବିକ୍ରି କରିବା ପାଇଁ ଚାଷୀ ମଣ୍ତିକୁ ଧାନ ନେଉଛି । ହେଲେ ମିଲର୍ସଙ୍କ ମନମାନୀ ଯୋଗୁଁ ଚାଷାପୁଅ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛି ।
ଚିନ୍ତାରେ ଅନ୍ନଦାତା: ମିଲର୍ସଙ୍କ ମନମାନୀ, ମଣ୍ତିରେ ପଡି ରହିଛି ଧାନ
ଏଭଳି ପରିସ୍ଥିତି ଉପୁଜିଛି କଳାହାଣ୍ତି ଜିଲ୍ଲାରେ । କେଉଁଠି ଶୀତ କାକରରେ ମଣ୍ଡିରେ ଧାନ ପଡି ରହିଛି ତ ଆଉ କେଉଁଠି ଚାଷୀଙ୍କୁ ଟୋକନ ଦେଇ ମିଲର୍ସର ଦେଖାନାହିଁ । କେବଳ ସେତିକି ନୁହେଁ କିଛି ମଣ୍ଡିରେ ମିଲର୍ସମାନେ ଧାନ କୁଇଣ୍ଟାଲ ପିଛା ୮ ରୁ ୯ କେଜି କଟନି ଛଟନି କରୁଥିବା ଚାଷୀ ଅଭିଯୋଗ କରିଛନ୍ତି। ମଣ୍ତିରେ ଧାନ ବିକ୍ରି କରିବା ପାଇଁ ଚାଷୀ ଧାନ ଧରି ଶୀତ କାକରରେ ଜଗି ରହିଛି । ଯାହାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।