ଭବାନୀପାଟଣା:ଶାରଦୀୟ ଦୁର୍ଗାପୂଜା ଅବସରରେ ରାଜ୍ୟର ସବୁ ଶକ୍ତିପୀଠ ଗୁଡିକରେ ଚାଲିଛି ପୂଜାର୍ଚ୍ଚନା । ଦୁଇ ବର୍ଷପରେ ମହାଆଡମ୍ବରରେ ମା' ଜଗତଜନନୀଙ୍କ ଆରଧନା କରାଯାଉଛି । ଓଡିଶାରେ ରହିଥିବା ବିଭିନ୍ନ ଶକ୍ତିପୀଠ ମଧ୍ୟରୁ ଅନ୍ୟତମ କଳାହାଣ୍ଡି ଜିଲ୍ଲା ଉଦୟଗିରି ପାହାଡ଼ ସ୍ଥିତ ତାଳଗୁଡ଼ ଗ୍ରାମର ଅଧିଷ୍ଠାତ୍ରୀ ଦେବୀ ମା' ଡୋକରୀଙ୍କ ମନ୍ଦିରରେ ମଧ୍ୟ ନବରାତ୍ରୀ ପୂଜା ଅନୁଷ୍ଠିତ ହୋଇଯାଇଛି । ମା' ଡୋକରୀ କଳାହାଣ୍ଡିର ବାଉଁଶ ବଣର ଦେବୀ ମା' ଭାବେ ପରିଚିତ । ଶହ ଶହ ବର୍ଷ ଧରି ଗଙ୍ଗ ବଂଶ ଓ ନାଗ ବଂଶର ଉତ୍ତରାଧିକାରୀଙ୍କ ଦ୍ଵାରା ପୂଜା ପାଇ ଆସୁଛନ୍ତି ଦେବୀ ମା' । ମା'ଙ୍କ ନିକଟରେ ବିଜୟା ଦଶମୀ ପୂଜାର୍ଚ୍ଚନା ଶେଷ ହୋଇଛି ।
ସରିଲା ଦେବୀଙ୍କ ବିଜୟା ଦଶମୀ ପୂଜାର୍ଚ୍ଚନା ଜୟପାଟଣାର ପୂର୍ବରେ ଅବସ୍ଥିତ ଉଦୟଗିରି ପାହାଡ଼ ସ୍ଥିତ ତାଳଗୁଡ଼ ଗ୍ରାମରେ ମା' ଡୋକରୀ ପୀଠ ଅବସ୍ଥିତ । ସୁଉଚ୍ଚ ପାହାଡ କୋଳରେ ପ୍ରାକୃତିକ ପରିବେଶରେ ଦେବୀ ମା' ପୂଜା ପାଉଛନ୍ତି । ବନଦୁର୍ଗା ମନ୍ତ୍ରରେ ଷୋଡ଼ଶ ଉପଚାରରେ ପୂଜା ପାଉଥିବା ମା' ଡୋକରୀଙ୍କ ଶାରଦୀୟ ନବରାତ୍ରୀ ପୂଜା ଆଶ୍ୱିନ ମାସ ପ୍ରତିପଦାରୁ ଆରମ୍ଭ ହୋଇ ମହାନବମୀ ପର୍ଯ୍ୟନ୍ତ ଚାଲିଥାଏ । ମହାଳୟା ମଧ୍ୟରାତ୍ରିରେ ଏକ ନିର୍ଦ୍ଦିଷ୍ଟ ସ୍ଥାନରୁ ମାଟି ଆଣି ପ୍ରତିପଦାରେ ମା'ଙ୍କ ମସ୍ତକ ରୋପଣ କରାଯାଏ । ଏହାପରେ ମା'ଙ୍କ ପୂଜାର୍ଚ୍ଚନା ଆରମ୍ଭ କରାଯାଏ । ମା' ଡୋକରୀ ଦକ୍ଷିଣକାଳୀ ଭାବରେ ପୂଜା ପାଆନ୍ତି । ପାଇକ ସମ୍ପ୍ରଦାୟର ପୂଜକମାନେ ମା'ଙ୍କ ନିୟମିତ ଭାବରେ ପୂଜା କରି ଆସୁଥିବା ବେଳେ ନବରାତ୍ରୀ ସମୟରେ ବନଦୁର୍ଗା ମନ୍ତ୍ରରେ ଷୋଡ଼ଶ ଉପଚାରରେ ବ୍ରାହ୍ମଣ ମାନେ ପୂଜା କରିଥାନ୍ତି ।
ମନ୍ଦିର ପରିଚାଳନା ଦାୟିତ୍ବ ମହୁଳପାଟଣା ଜମିଦାରଙ୍କ ହାତରେ ରହିଛି । ୧୧ ବର୍ଷ ହେଲା ରଘୁବୀର ପ୍ରତାପଦେଓ ଜମିଦାର ଭାବରେ ମା' ଡୋକରୀଙ୍କ ପୂଜାର୍ଚ୍ଚନାରେ ସାମିଲ ହେଉଛନ୍ତି । ତେବେ ଅଷ୍ଟମୀ ମଧ୍ୟରାତ୍ରିରେ ମା' ଡୋକରୀଙ୍କ ମାନସିକଧାରୀମାନେ ଛାଗଲ ବଳି ଅର୍ପଣ କରନ୍ତି । ମା'ଙ୍କ ପୀଠରେ ଲାଠିଯାତ୍ରା ଅନୁଷ୍ଠିତ ହୋଇଥାଏ । ମହାଷ୍ଟମୀ ଯାତ୍ରା ପାଇଁ ବାନେର ସ୍ଥିତ ମା' ବୁଢ଼ୀ ପଦରେନଙ୍କ ସମେତ ଜୟପାଟଣା, ପିପଲଗୁଡା, ଖାଲିଆଭଟା, ପ୍ରତାପପୁର, କରଞ୍ଜିଗୁଡା, ଗହିପାଣି ଆଦି ସ୍ଥାନ ଦେଇ ଦେବୀ ମା'ଙ୍କର ପ୍ରତୀକ ଲାଠି ଆସିଥାଏ । ପ୍ରାୟ ୧୮ କିଲୋମିଟର ରାସ୍ତା ଅତିକ୍ରମ କରି ମା' ଡୋକରୀଙ୍କ ଅଷ୍ଟମୀ ପୂଜାରେ ଏହି ଲାଠି ମା'ଙ୍କ ପୂଜାରେ ବ୍ୟବହାର ହୁଏ ।
ଏହାମଧ୍ୟ ପଢନ୍ତୁ:ବୋମନା କୁଲୁବୁ ପୂଜା: ନବରାତ୍ରୀରେ କଣ୍ଡେଇ ପୂଜନ୍ତି ତେଲୁଗୁ ପରିବାର
ଲାଠିଯାତ୍ରା ସମୟରେ ହଜାର ହଜାର ଶ୍ରଦ୍ଧାଳୁ ରାସ୍ତାର ଉଭୟ ପାର୍ଶ୍ଵରେ ରହି ମା'ଙ୍କୁ ଭକ୍ତି ଅର୍ଘ୍ୟ ଦେଇଥାନ୍ତି । ମହନବମୀ ପୂଜା ପରେ ମା'ଙ୍କ ଦଶମୀ ତିଥିରେ ଅନ୍ତିମ ପୂଜା ହୁଏ । ଏହାପରେ ଦହି ଅନ୍ନ ଲାଗି ହୁଏ । ଦେବୀ ମା'ଙ୍କ ରୋପିତ ମସ୍ତକକୁ ବିସର୍ଜନ କଲାପରେ ମନ୍ଦିର ୯ ଦିନ ପାଇଁ କଣ୍ଟାବାଡ଼ ଦିଆଯାଇଥାଏ । ୯ ଦିନର ଅଣସର ପରେ ମା’ ପୁନର୍ବାର ପୂଜା ପାଇଥାନ୍ତି ।
ଇଟିଭି ଭାରତ, କଳାହାଣ୍ଡି
