ଭବାନୀପାଟଣା: ଯୌତୁକ ଜନିତ ବଧୂହତ୍ୟା ମାମଲା । ଯୌତୁକ ଜନିତ ହତ୍ୟାକାଣ୍ଡ ଘଟଣାରେ ସ୍ବାମୀ, ଶ୍ବଶୁର ଓ ନଣନ୍ଦକୁ ୧୪ ବର୍ଷ କାରାଦଣ୍ଡ ନିର୍ଦ୍ଦେଶ । ୨୦୧୪ ମସିହାରେ ବଧୂହତ୍ୟା ନେଇ କେଗାଁ ଥାନାରେ ଅଭିଯୋଗ ହୋଇଥିଲା । ୮ ବର୍ଷ ପରେ ମାମଲାର ଶୁଣାଣି କରି ଦୋଷୀଙ୍କୁ ଏଭଳି ଦଣ୍ଡାଦେଶ ଶୁଣାଇଛନ୍ତି ଭବାନୀପାଟଣା ଅତିରିକ୍ତ ଜିଲ୍ଲା ଓ ଦୌରାଜଜ । ଦୋଷୀଙ୍କୁ ୧୪ ବର୍ଷ ଜେଲ ଦଣ୍ଡ ସହ ୧୦ ହଜାର ଟଙ୍କା ଜୋରିମାନା ନିର୍ଦ୍ଦେଶ ଦେଇଛନ୍ତି କୋର୍ଟ ।
ସୂଚନା ଅନୁଯାୟୀ କଳାହାଣ୍ଡି ଜିଲ୍ଲା ତୁର୍କେଲ ଗାଁର ନରେନ୍ଦ୍ର ବାଗଙ୍କ ଝିଅ ଯଶୋବନ୍ତୀ ବାଗଙ୍କୁ କେଗାଁ ଥାନା ଅନ୍ତର୍ଗତ ଡଙ୍ଗାପଖାନ ଗାଁର ଦଧି ଜାଲଙ୍କୁ ବିବାହ କରିଥିଲେ । ବିବାହ ସମୟରେ ସୁନାଚେନ ଦେଇ ନଥିବା ଯୋଗୁଁ ଦଧିଙ୍କ ପରିବାର ବୋହୁ ଯଶୋବନ୍ତୀଙ୍କୁ ବାରମ୍ବାର ନିର୍ଯାତନା ଦେଉଥିଲେ । ତେବେ ଯଶୋବନ୍ତୀ ବାଗଙ୍କ ଦ୍ଵିତୀୟ ସନ୍ତାନର ଏକୋଇଶିଆ ଦିନ ସୁନା ଚେନ ଦେଇ ନଥିବା ଅଭିଯୋଗରେ ସ୍ଵାମୀ ଦଧି ଜାଲ, ଶ୍ଵଶୁର ଝଜ ଜାଲ ଓ ନଣନ୍ଦ ଘନକେଶୀ ଜାଲ ମିଶି ଯଶୋବନ୍ତୀଙ୍କୁ ହତ୍ୟାକରି ଏହାକୁ ଆତ୍ମହତ୍ୟାର ରୂପ ଦେବାକୁ ଯାଇ ଯଶୋବନ୍ତୀଙ୍କ ବେକରେ ଶାଢ଼ୀ ବାନ୍ଧି ଝୁଲାଇ ଦେଇଥିଲେ । ଏନେଇ ଯଶୋବନ୍ତୀଙ୍କ ବାପା ନରେନ୍ଦ୍ର ବାଗ କେଗାଁ ଥାନାରେ ୨୦୧୪ ମସିହାରେ ଝିଅକୁ ହତ୍ୟା କରାଯାଇଥିବା ନେଇ ଅଭିଯୋଗ କରିଥିଲେ ।