ଭବାନୀପାଟଣା:ସ୍କୁଲ ଛାଡି ରାଜରାସ୍ତାକୁ ଓହ୍ଲାଇବେ ଶିକ୍ଷକ । ଚକ ବଦଳରେ ମାଇକ ଓ ଫ୍ଲାକକାର୍ଡ ଧରି କରିବେ ନିଜ ହକ ପାଇଁ ଲଢେଇ । ଶିକ୍ଷକଙ୍କ ସମସ୍ୟାକୁ ଅଣଦେଖା କରାଯାଉଥିବା ଅଭିଯୋଗ କରି ଆନ୍ଦୋଳନକୁ ଓହ୍ଲାଇବା ପାଇଁ ଶିକ୍ଷକ ସଂଘ ପକ୍ଷରୁ ନିଷ୍ପତ୍ତି ନିଆଯାଇଛି । ଏନେଇ କଳାହାଣ୍ଡି ଜିଲ୍ଲା ଶିକ୍ଷକ ଭବନ ଠାରେ ଜିଲ୍ଲା ପ୍ରାଥମିକ ଶିକ୍ଷକ ସଂଘ ପକ୍ଷରୁ ଏକ ବୈଠକ ଅନୁଷ୍ଠିତ ହୋଇଯାଇଛି ।
ଅନୁଷ୍ଠିତ ବୈଠକରେ ଜିଲ୍ଲାର ସମସ୍ତ ପ୍ରାଥମିକ ଶିକ୍ଷକ ସାମିଲ ହୋଇଥିଲେ । ଅଭିଯୋଗ ଅନୁଯାୟୀ ପ୍ରାଥମିକ ବିଦ୍ୟାଳୟରେ ୨୦୦୧ ମସିହା ଠାରୁ ସ୍ବେଚ୍ଛାସେବୀ ଶିକ୍ଷା ସହାୟକ ଭାବରେ ନିଯୁକ୍ତ କରିଥିଲେ ରାଜ୍ୟ ସରକାର । ହେଲେ ଦୀର୍ଘ ବର୍ଷ ଧରି କାମ କଲା ପରେ ମଧ୍ୟ ଚୁକ୍ତି ଭିତ୍ତିକ ପଦବୀର ଅବଧି ଉଚ୍ଛେଦ ହୋଇପାରି ନାହିଁ । ଏହାସହ ବର୍ତ୍ତମାନ ସୁଦ୍ଧା ୬ଟି ଜାତୀୟ ଇଂକ୍ରିମେଣ୍ଟ ପ୍ରଦାନ କରାଯାଇ ନାହିଁ । ଗତ କିଛି ଦିନ ତଳେ ରାଜ୍ୟ ସରକାର ଚୁକ୍ତି ଭିତ୍ତିକ ଅବଧିକୁ ମୂଳ ଚାକିରୀରେ ମିଶାଇବା ଓ ୬ଟି ଇଂକ୍ରିମେଣ୍ଟ ଦେବା ପାଇଁ ଘୋଷଣା କରିଥିଲେ । ହେଲେ ସରକାରଙ୍କ ଏହି ଘୋଷଣାରୁ ପ୍ରାଥମିକ ଶିକ୍ଷକଙ୍କୁ ବାଦ ଦିଆଯାଇଛି । ଯାହାକୁ ନେଇ ଶିକ୍ଷକମାନେ କ୍ଷୋଭ ପ୍ରକାଶ କରିଛନ୍ତି ।