କଳାହାଣ୍ଡି: ସରକାରୀ ଆମ୍ବୁଲାନ୍ସ ଉପରେ ବି ଭରସା ନାହିଁ । ଅଧବାଟରେ ଚକା ଫାଟିବା କାରଣରୁ ଗୁରୁତର ଆହତ ରୋଗୀଙ୍କୁ ବାଟରେ 1 ଘଣ୍ଟା ଅଟକିବାକୁ ପଡିଛି । ଏପରି ଘଟଣା ଦେଖିବାକୁ ମିଳିଛି କଳାହାଣ୍ଡିର ନୂଆଗୁଡା ଗାଁରେ । ଏପରିକି ଆମ୍ବୁଲାନ୍ସ ଡ୍ରାଇଭର କର୍ତ୍ତୃପକ୍ଷଙ୍କୁ ଏ ବିଷୟରେ ଅବଗତ କରାଇଥିଲେ ମଧ୍ୟ ଦୀର୍ଘ ଏକ ଘଣ୍ଟା ପର୍ଯ୍ୟନ୍ତ କୌଣସି ଆମ୍ବୁଲାନ୍ସ ଆସି ନଥିଲା । ଶେଷରେ ଗଣମାଧ୍ୟମ ପ୍ରତିନିଧିଙ୍କ ହସ୍ତକ୍ଷେପ ଫଳରେ ଆମ୍ବୁଲାନ୍ସ ଆସିଥିଲା ।
ସୂଚନା ଅନୁସାରେ, ନୂଆଗୁଡା ଗ୍ରାମର ଯମୁନା ନାଏକ ଜୟପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ଆସିଥିଲେ । ସେଠାରେ ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ଭବାନୀପାଟଣା ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଉଥିଲା । ହେଲେ ବାଟରେ ଆମ୍ବୁଲାନ୍ସର ଚକ ଫାଟିଯିବାରୁ 1 ଘଣ୍ଟା ବାଟରେ ଅଟକି ରହିଥିଲେ । ଆମ୍ବୁଲାନ୍ସ ଡ୍ରାଇଭର ଘଟଣା ସଂପର୍କରେ ବିଭାଗୀୟ ଅଧିକାରୀଙ୍କୁ ଜଣାଇଥିଲେ ମଧ୍ୟ କୌଣସି ଫଳ ମିଳି ନଥିଲା । ଶେଷରେ ଗଣମାଧ୍ୟମ ପ୍ରତିନିଧିମାନେ କଳାହାଣ୍ଡି ସିଡିଏମଙ୍କୁ ଏହି ବିଷୟରେ ଅବଗତ କରାଇଥିଲେ । ଏହାପରେ ଅନ୍ୟ ଏକ ଆମ୍ବୁଲାନ୍ସରେ ଯମୁନା ନାଏକଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା ।