ଭବାନୀପାଟଣା: କଳାହାଣ୍ଡି ଜିଲ୍ଲାରେ ଦିନକୁ ଦିନ କାୟା ବିସ୍ତାର କରିଚାଲିଛି ମହାମାରୀ କୋରୋନା । କୋରୋନା କବଳରୁ ଡାକ୍ତରମାନେ ମଧ୍ୟ ବାଦ ପଡିନାହାନ୍ତି । ଏଭଳି ସ୍ଥିତି ଜିଲ୍ଲାର ବିଭିନ୍ନ ବ୍ଲକରେ ଦେଖା ଦେଇଥିଲେ ମଧ୍ୟ ବେଶ ସମ୍ବେଦନଶୀଳ ହୋଇପଡିଛି ନର୍ଲା ବ୍ଲକ । ପ୍ରତିଦିନ ଏହି ବ୍ଲକରୁ ରୋଗୀ ସଂଖ୍ୟା ବଢୁଥିବା ବେଳେ ସ୍ବାସ୍ଥ୍ୟ କର୍ମଚାରୀ ମଧ୍ୟ କୋରୋନା ଆକ୍ରାନ୍ତ ହେଉଛନ୍ତି।
ଗତ ଦୁଇ ସପ୍ତାହ ମଧ୍ୟରେ କୋରୋନା ଆକ୍ରାନ୍ତ ରୋଗୀ ଚିହ୍ନଟ ପରେ ଦୁଇ ଦୁଇ ଥର ନର୍ଲାକୁ ପ୍ରଶାସନ ସଟଡାଉନ ଘୋଷଣା କରିଥିଲା । ଶୁକ୍ରବାର ଆଉ ଜଣେ ପ୍ରବାସୀ ଓ ଦୁଇ ଜଣ ମହିଳା ଡାକ୍ତର ପଜିଟିଭ ଚିହ୍ନଟ ହେବା ପରେ ଏମାନଙ୍କ କଣ୍ଟ୍ରାକ୍ଟ ଟ୍ରେସିଂ ପ୍ରକ୍ରିୟା ଆରମ୍ଭ ହୋଇଥିଲା। ପରେ ନର୍ଲା ଓ ରୁପ୍ରା ରୋଡ଼କୁ ୨୪ ଘଣ୍ଟା ପାଇଁ ସଟଡାଉନ ଘୋଷଣା କରିଦିଆଯାଇଛି । ଏହାସହ ନର୍ଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ସାନିଟାଇଜ କରାଯାଇ ସାମୟିକଭାବେ ରୋଗୀ ସେବାକୁ ବନ୍ଦ କରି ଦିଆଯାଇଛି ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ