ଝାରସୁଗୁଡ଼ା: ଶିକ୍ଷାଠୁ ନିଯୁକ୍ତି ପର୍ଯ୍ୟନ୍ତ ପଛୁଆ ବର୍ଗଙ୍କ ପାଇଁ ସଂରକ୍ଷଣ ଦାବୀ

ଝାରସୁଗୁଡ଼ାରେ ଶିକ୍ଷାଠୁ ନିଯୁକ୍ତି ପର୍ଯ୍ୟନ୍ତ ପଛୁଆ ବର୍ଗଙ୍କ ସଂରକ୍ଷଣ ଲାଗି ଦାବୀ କଲା ଜିଲ୍ଲା ଓବିସି ମଞ୍ଚ । ଅଧିକ ପଢନ୍ତୁ

ଝାରସୁଗୁଡ଼ା: ଜିଲ୍ଲାରେ ଶିକ୍ଷା ଠାରୁ ଆରମ୍ଭ କରି ନିଯୁକ୍ତି କ୍ଷେତ୍ର ପର୍ଯ୍ୟନ୍ତ ସବୁଠି ପଛୁଆ ବର୍ଗଙ୍କ ପାଇଁ ସଂରକ୍ଷଣ ପ୍ରଦାନ ପାଇଁ ଉଠିଛି ଦାବୀ । ଝାରସୁଗୁଡ଼ା ଓବିସି ମଞ୍ଚ ପକ୍ଷରୁ ଏହି ଦାବୀ କରାଯାଇଥିବା ବେଳେ ମଙ୍ଗଳବାର ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ଝାରସୁଗୁଡ଼ା ଜିଲ୍ଲାପାଳଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି ।

କେନ୍ଦ୍ର ସରକାରଙ୍କ ନିଷ୍ପତ୍ତି କ୍ରମେ ପଛୁଆ ବର୍ଗଙ୍କୁ ଦେଶର ଅଧିକାଂଶ ରାଜ୍ୟ କେନ୍ଦ୍ର ସରକାରଙ୍କ ନୀତି ଅନୁସରଣ କରି ସଂରକ୍ଷଣ ଦେଇ ଚାଲିଛନ୍ତି । ମାତ୍ର ଓଡ଼ିଶାରେ ରାଜ୍ୟ ସରକାର ସେମାନଙ୍କୁ ସଂରକ୍ଷଣ ତାଲିକାଭୁକ୍ତ ନକରିବା ଦୁର୍ଭାଗ୍ୟର ବିଷୟ ବୋଲି ଓବିସି ମଞ୍ଚ ପକ୍ଷରୁ କୁହାଯାଇଛି । ତେବେ ଯଥାଶୀଘ୍ର ଓବିସିଙ୍କ ପାଇଁ ଜାତି ଭିତ୍ତିକ ଜନଗଣନା ଆଧାରରେ ସ୍ବତନ୍ତ୍ର ସଂରକ୍ଷଣ ଲାଗୁ ପାଇଁ ଦାବୀ ଉଠିଛି ।

ଶିକ୍ଷା, ସରକାରୀ ବା ବେସରକାରୀ ସମସ୍ତ ବିଭାଗ ଏପରିକି ରାଜନିତୀ କ୍ଷେତ୍ରରେ ମଧ୍ୟ ଓବିସିଙ୍କ ପାଇଁ ସଂରକ୍ଷଣ ବ୍ୟବସ୍ଥା କରିବା, ଅନୁସୂଚୀତ ଜାତି ଓ ଜନଜାତିଙ୍କ ଭଳି ଓବିସିଙ୍କ ମଧ୍ୟରେ ସୁଖବାସୀଙ୍କ ପ୍ରଥାକୁ ବାଦ ଦେବା, ମଣ୍ଡଳ କମିଶନଙ୍କ ସୁପାରିଶ ଲାଗୁ କରିବା ସହ ଓବିସିଙ୍କ ପାଇଁ ସ୍ବତନ୍ତ୍ର ସଂରକ୍ଷଣ ବ୍ୟବସ୍ଥା ଲାଗୁ କରିବା ଆଦି ଉକ୍ତ ଦାବୀପତ୍ରରେ ଉଲ୍ଲେଖ ରହିଛି ।

ଇଟିଭି ଭାରତ, ଝାରସୁଗୁଡ଼ା