ଝାରସୁଗୁଡ଼ା: ଚାଷୀଙ୍କ ପାଇଁ ଖୁସି ଖବର । ଏଣିକି ଚାଷୀଙ୍କୁ ମିଳିବ ଜଳସେଚନର ସୁବିଧା । ବଢ଼ିବ ଉଠାଜଳସେଚନ ପ୍ରକଳ୍ପର ସଂଖ୍ୟା । ଆଉ ହେବନି ଚାଷୀଙ୍କୁ ଜଳସେଚନରେ କୌଣସି ଅସୁବିଧା । ଏଭଳି କିଛି ମନ୍ତବ୍ୟ ଆସିଛି ଝାରସୁଗୁଡା ଜିଲ୍ଲାପାଳ କାର୍ଯ୍ୟାଳୟ ପରିସରରେ ଥିବା DMF କକ୍ଷରେ ଚାଲିଥିବା ସ୍ଵାସ୍ଥ୍ୟ ମନ୍ତ୍ରୀଙ୍କ ସମୀକ୍ଷା ବୈଠକରୁ ।
ସୂଚନାନୁସାରେ ଜିଲ୍ଲାରେ ୨୦୦୯ରେ ୯ ପ୍ରତିଶତ ଉଠାଜଳସେଚନ ପ୍ରକଳ୍ପ ରହିଥିଲା । କିନ୍ତୁ ବର୍ତ୍ତମାନ ଅର୍ଥାତ୍ ୨୦୨୨ ସୁଦ୍ଧା ଏହା ୨୨ ପ୍ରତିଶତକୁ ବୃଦ୍ଧି ପାଇଛି । ଯାହା ଜିଲ୍ଲାର ଚାଷୀଙ୍କ ପାଇଁ ଅତ୍ୟନ୍ତ ଶୁଭ କଥା । ଏହି ଲିଫ୍ଟ ଇରିଗେସନ ଏବଂ ମେଗା ଲିଫ୍ଟ ଇରିଗେସନ ଦ୍ବାରା ଚାଷୀ ପାଇପାରିବେ ଜଳସେଚନର ସୁବିଧା । ତେଣୁ ଏହାକୁ ଜିଲ୍ଲାର ବିଭିନ୍ନ ଅଞ୍ଚଳରେ ନିର୍ମାଣ କରି ଚାଷୀଙ୍କୁ ସୁବିଧା ଯୋଗାଇ ଦିଆଯିବ । ତେବେ ଏହି ପ୍ରକଳ୍ପ ନିର୍ମାଣ ହେବା ଦ୍ବାରା ପ୍ରଭାବିତ ହେଉଥିବା ଚାଷୀଙ୍କ ପାଇଁ ସରକାର ଓ ଜିଲ୍ଲା ପ୍ରଶାସନ ପକ୍ଷରୁ ସହାୟତା କରାଯିବ । ନଚେତ ପ୍ରକଳ୍ପ ନିର୍ମାଣର ଅନ୍ୟତ୍ର ସ୍ଥାନାନ୍ତର କରାଯିବ ବୋଲି କହିଛନ୍ତି ମନ୍ତ୍ରୀ ନବକିଶୋର ଦାସ । ତେବେ କୃଷି ଓ କୃଷକଙ୍କ ପାଇଁ ଉଠାଜଳସେଚନ ପ୍ରକଳ୍ପ ଓ ଜଳସେଚନ ପାଇଁ କିଭଳି ପଦକ୍ଷେପ ନିଆଯାଇ ହେବ ତାହାକୁ ନେଇ ଆଲୋଚନା କରାଯାଇଥିଲା ।