ଝାରସୁଗୁଡା: ବ୍ରଜରାଜନଗର ପୋଲିସ ଓ ଅବକାରୀ ବିଭାଗର ମିଳିତ ଚଢାଉରେ ଝାରସୁଗୁଡାରୁ ବିପୁଳ ପରିମାଣର ନକଲି ବିଦେଶୀ ମଦ ଜବତ ହୋଇଛି । ଘଟଣାରେ ଜଣେ ମହିଳାଙ୍କୁ ଗିରଫ ମଧ୍ୟ କରାଯାଇଛି । ଏଥିସହ ମଦ ପ୍ୟାକେଜିଂ ପାଇଁ ବ୍ୟବହୃତ ହେଉଥିବା ବିଭିନ୍ନ ନାମୀଦାମୀ କମ୍ପାନୀର ବୋତଲ, ବ୍ରାଣ୍ଡେଡ ଠିପି ଏବଂ ଝାଡ଼ଖଣ୍ଡ ସରକାରଙ୍କ ନକଲି ଲେବୁଲ ଆଦି ଜବତ ହୋଇଛି ।
ସୂଚନା ଅନୁଯାୟୀ ଝାରସୁଗୁଡା ଜିଲ୍ଲା ତିଲେଇମାଲ ଗାଁର ମୀନ ବେହେରାଙ୍କ ଘରେ ଆଜି(ବୁଧବାର) ସକାଳୁ ଅବକାରୀ ବିଭାଗ ପକ୍ଷରୁ ଅତର୍କିତ ଚଢ଼ାଉ କରା ଯାଇଥିଲା । ତେବେ ଚଢାଉ ସମୟରେ ୪୬୮ ଟି ବିଭିନ୍ନ ନାମୀ ଦାମୀ ବ୍ରାଣ୍ଡର ବିଦେଶୀ ମଦ ଜବତ କରାଯାଇଛି । ଏହାର ଆନୁମାନିକ ମୂଲ୍ୟ ଦେଢ଼ ଲକ୍ଷ ଟଙ୍କାରୁ ଅଧିକ ହେବ ବୋଲି ଜଣାପଡିଛି । ତେବେ ଚଢ଼ାଉ ହୋଇଥିବା ଘରେ କେହି ପୁରୁଷ ସଦସ୍ୟ ନଥିବାରୁ ଜଣେ ମହିଳାଙ୍କ ସମ୍ପୃକ୍ତି ଥିବା ଜାଣି ଅବକାରୀ ବିଭାଗ ପକ୍ଷରୁ ସମ୍ପୃକ୍ତ ମହିଳାଙ୍କୁ ଗିରଫ କରାଯାଇ ଅଧିକ ତଦନ୍ତ ଆରମ୍ଭ କରାଯାଇଛି ।