ଝାରସୁଗୁରଡା: ପାଖଉଛି ବ୍ରଜରାଜନଗର ଉପନିର୍ବାଚନ ତାରିଖ । ଦିନ ଯେତିକି ପାଖଉଛି ସେହିମାତ୍ରାରେ ଜମୁଛି ପ୍ରଚାର । ତେବେ ପ୍ରଚାର ଶେଷ ପର୍ଯ୍ୟାୟରେ ଥିବାବେଳେ ହାତରେ ଆଉ ମାତ୍ର ୩ ଦିନ ରହିଲା । ଗରମ ଉଷ୍ମତ୍ତାଠୁ ବଳି ଯାଉଛି ନିର୍ବାଚନ ତାତି । ଗର୍ଜୁଛନ୍ତି ହେବିୱେଟ ନେତା । ଏ ନେଇ ସମସ୍ତ ୩ ରାଜନୈତିକ ଦଳ ପକ୍ଷରୁ ସଭା, ଶୋଭାଯାତ୍ରା, ସମାବେଶ ଜୋରଦାର ହୋଇଛି । ଲୋକଙ୍କ ମନ ଜିତିବାକୁ ସବୁ ପ୍ରକାଶ କୌଶଳ ଆପଣେଇଛନ୍ତି ପ୍ରାର୍ଥୀ । ବ୍ରଜରାଜନଗର ଉପନିର୍ବାଚନ ତ୍ରିମୁଖୀ ଲଢେଇରେ କାହାର ଜିତାପଟ ହେବ । କିଏ ଜିତିବ ବ୍ରଜରାଜନଗର ବାଜି । ପୌରାଞ୍ଚଳ ଠାକୁରପଡା BJD ତରଫରୁ ମହିଳା ସମାବେଶ କରାଯାଇଛି ।
ସମାବେଶରେ ରାଜ୍ୟ ବିଜେଡି ମହିଳା ସଭାନେତ୍ରୀ ସ୍ନେହାଙ୍ଗିନୀ ଛୁରିଆ, ପ୍ରଚାର କମିଟି ମୁଖ୍ୟ ସଂଯୋଜିକା ଦୀପାଳି ଦାସ, ମନ୍ତ୍ରୀ ପ୍ରତାପ ଜେନା, ମନ୍ତ୍ରୀ ବିକ୍ରମ କେଶରୀ ଆରୁଖ, ସଂଜୟ ଦାସବର୍ମା, ପ୍ରମିଳା ମଲ୍ଲିକ, ନଳିନୀ ପ୍ରଧାନ ପ୍ରମୁଖ ଯୋଗଦେଇଛନ୍ତି । ମହିଳାଙ୍କ ବିକାଶ ସଦା ସର୍ବଦା ମୁଖ୍ୟମନ୍ତ୍ରୀ ପ୍ରାଥମିକତା ଦେଇ ଆସିଛନ୍ତି । ଏନେଇ ମହିଳା ଭୋଟରଙ୍କୁ ହାତେଇବା ପାଇଁ ବିଜେଡ଼ି ଲାଗିପଡିଛି । ବିଜେଡି ପ୍ରାର୍ଥୀଙ୍କୁ ସହାନୂଭୂତି ସାହା ହେଉଛି ନା ସରକାରଙ୍କ ବିଫଳତାକୁ ଅସ୍ତ୍ର କରିଥିବା ବିରୋଧୀଙ୍କ କାର୍ଯ୍ୟ ସଫଳ ହେଉଛି ତାହା ସମୟ କହିବ ।