ପିପିଲିକାନି ଆଶ୍ରମ ବିଦ୍ୟାଳୟର ଛାତ୍ରୀ ମୃତ, ସ୍କୁଲରେ ଉତ୍ତେଜନା

ଝାରସୁଗୁଡା ଜିଲ୍ଲା ପିପିଲିକାନି ଆଶ୍ରମ ବିଦ୍ୟାଳୟରେ ଷଷ୍ଠ ଶ୍ରେଣୀ ଛାତ୍ରୀ ମୃତ । ମୃତଦେହ ରଖି ପରିବାର ଲୋକଙ୍କ ଧାରଣା । ଅଧିକ ପଢନ୍ତୁ

ଝାରସୁଗୁଡା:ଝାରସୁଗୁଡା ଜିଲ୍ଲା ପିପିଲିକାନି ଆଶ୍ରମ ବିଦ୍ୟାଳୟରେ ଜଣେ ଷଷ୍ଠ ଶ୍ରେଣୀ ଛାତ୍ରୀଙ୍କ ମୃତ୍ୟୁ । ଏନେଇ ଆଶ୍ରମ ସ୍କୁଲ ସମ୍ମୁଖରେ ମୃତଦେହ ରଖି ପରିବାର ଓ ସ୍ଥାନୀୟ ଲୋକେ ଧାରଣା ଦେଇଥିଲେ । ତେବେ ମୃତ ଛାତ୍ର ଜଣକ ଛାତ୍ରୀ ଜଣକ ଅଇଁଲାପାଲି ଗ୍ରାମର ବବଲି ସା ବୋଲି ଜଣାପଡିଛି ।

ସୂଚନା ମୁତାବକ, ଗତ 18 ତାରିଖ ଦିନ ସ୍କୁଲ କର୍ତ୍ତୁପକ୍ଷ ବବଲିଙ୍କୁ ଖାଲି ପେଟରେ ଫାଇଲେରିଆ ମେଡ଼ିସିନ ଖାଇବାକୁ ଦେଇଥିଲେ । ଏନେଇ ଗତ ୨୫ ତାରିଖ ଦିନ ବବଲିଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବା ପରେ 26 ତାରିଖରେ ପରିବାର ଲୋକେ ତାଙ୍କୁ ଘରକୁ ନେଇଥିଲେ । ଏହାପରେ କୁମ୍ଭାରବନ୍ଧ ଚିକିତ୍ସାଳୟରେ ଦେଖାଇବା ପରେ ଗତକାଲି ତାଙ୍କୁ ଜିଲ୍ଲାମୁଖ୍ୟ ଚିକିତ୍ସାଳୟକୁ ଆଣିଥଲେ l ହେଲେ ଜିଲ୍ଲା ଚିକିତ୍ସାଧୀନ ଅବସ୍ଥାରେ ବବଲିଙ୍କ ମୃତ୍ୟୁ ହୋଇଥିବା ପରିବାର ଲୋକଙ୍କ ପକ୍ଷରୁ ସୂଚନା ଦେଇଛନ୍ତି l

ଅନ୍ୟପଟେ ପିପିଲିକାନି ଆଶ୍ରମ ସ୍କୁଲ କର୍ତ୍ତୁପକ୍ଷଙ୍କ ଅବହେଳା ଯୋଗୁଁ ବବଲିଙ୍କ ଦେହ ଅସୁସ୍ଥ ହେବା ପରେ ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି ପରିବାର ଲୋକେ । ଏନେଇ ଗତକାଲି(ସୋମବାର) ବବଲିଙ୍କ ମୃତଦେହ ରଖି ଆନ୍ଦୋଳନ କରିଥିଲେ ପରିବାର ଲୋକେ l ସେପଟେ 18 ତାରିଖ ଦିନ ମଧ୍ୟାହ୍ନ ଭୋଜନ ପରେ ଫାଇଲେରିଆ ମେଡ଼ିସିନ ଦିଆଯାଇଥିବା ବେଳେ 21 ତାରିଖ ଦିନ ଜଣେ ସ୍ୱାସ୍ଥ୍ୟକର୍ମୀ ସ୍କୁଲକୁ ଆସି ଛାତ୍ରଛାତ୍ରୀଙ୍କ ସ୍ୱାସ୍ଥ୍ୟ ପରୀକ୍ଷା କରିଥିବା ପ୍ରକାଶ କହିଛନ୍ତି ସ୍କୁଲ କର୍ତ୍ତୃପକ୍ଷ । ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲା ।

ପ୍ରକାଶ ଥାଉକି, ଗତ କିଛି ମାସ ପୂର୍ବେ କନ୍ଧମାଳ ଜିଲ୍ଲା ତୁମୁଡ଼ିବନ୍ଧ ବ୍ଳକ ବେଲଘର ଥାନା ଅନ୍ତର୍ଗତ ଏକ ଆବାସିକ ବିଦ୍ୟାଳୟରେ ଜଣେ ସପ୍ତମ ଶ୍ରେଣୀ ଛାତ୍ରୀଙ୍କ ମୃତ୍ୟୁ ହୋଇଥିଲା । ଆବାସିକ ବିଦ୍ୟାଳୟର ଜନୈକା ସପ୍ତମ ଶ୍ରେଣୀ ଛାତ୍ରୀ ଗର୍ଭବତୀ ହୋଇଥିବା ଜଣା ପଡିଥିଲା । ଏହା ପରେ ବିଦ୍ୟାଳୟର ପ୍ରଧାନ ଶିକ୍ଷକ ବେଲଘର ଥାନାରେ ଏତଲା ଦେବାପରେ ଘଟଣା ସଂପର୍କରେ ଜଣାପଡିଥିଲା । ଏନେଇ ଜିଲ୍ଲା ଶିଶୁ ମଙ୍ଗଳ ସମିତି ପକ୍ଷରୁ ନାବାଳିକାଙ୍କୁ ଜି. ଉଦୟଗିରି ସୁଭଦ୍ରା ମହତାବ ଶିଶୁ ଯତ୍ନ ଗୃହରେ ଥଇଥାନ କରାଯାଇଥିଲା । ପରେ ନାବାଳିକାଙ୍କ ପ୍ରସବ ଯନ୍ତ୍ରଣା ଆସିବା ପରେ ତାଙ୍କୁ ଜି. ଉଦୟଗିରି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ସେଠାରେ ନାବାଳିକା ଜଣକ ଏକ ମୃତ ଶିଶୁ ପୁତ୍ରକୁ ଜନ୍ମ ଦେଇଥିବା ବେଳେ ସେଠାରେ ଚିକିତ୍ସାଧୀନ ଅବସ୍ଥାରେ ସେହି ଦିନ ହିଁ ନାବାଳିକାଙ୍କ ମୃତ୍ୟୁ ହୋଇଥିଲା ।

ଇଟିଭି ଭାରତ, ଝାରସୁଗୁଡା