ଯାଜପୁର: ବାଳାଶ୍ରମ ପଡିଆରେ ଉଦଘାଟିତ ହୋଇଛି ଅଷ୍ଟମ ଜିଲ୍ଲା ମହୋତ୍ସବ ଯଯାତି ଏବଂ ପଲ୍ଲିଶ୍ରୀ ମେଳା । ଜିଲା ସଂସ୍କୃତି ବିଭାଗ ପକ୍ଷରୁ ଆୟୋଜିତ ଏହି ମହୋତ୍ସବରେ ସ୍ଥାନ ପାଇଛି ଜିଲାର କଳା, ସଂସ୍କୃତିର ଝଲକ ।
ଯାଜପୁର ଜିଲ୍ଲା ମହୋତ୍ସବ ଯଯାତି ୨୦୨୦ ଉଦ୍ଘାଟିତ ଜିଲ୍ଲା ମହୋତ୍ସବକୁ ଯାଜପୁର ସାଂସଦ ଶର୍ମିଷ୍ଠା ସେଠୀ ଉଦ୍ଘାଟନ କରିଥିବାବେଳେ ପଲ୍ଲିଶ୍ରୀ ମେଳାକୁ ଶାସକ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ଓରମାସ ପକ୍ଷରୁ ଆୟୋଜିତ ପଲ୍ଲିଶ୍ରୀ ମେଳାରେ ବିଭିନ୍ନ ସ୍ୱୟଂସହାୟକ ଗୋଷ୍ଠୀଙ୍କ ଦ୍ବାରା ତିଆରି ଜିନିଷ ସ୍ଥାନ ପାଇଥିବାବେଳେ ଜିଲ୍ଲା ପାଇଁ ପରିଚିତ ବ୍ୟକ୍ତିଙ୍କୁ ସମ୍ବର୍ଦ୍ଧିତ କରାଯାଇଥିଲା ।
ଜିଲ୍ଲା ସଂସ୍କୃତି ପରିଷଦ ପକ୍ଷରୁ ଆୟୋଜିତ ମହୋତ୍ସବର ଉଦଘାଟନୀ ଉତ୍ସବରେ ପୂର୍ବତନ ମନ୍ତ୍ରୀ ଅମର ଶତପଥି, ସୁକିନ୍ଦା ବିଧାୟକ ପ୍ରୀତିରଞ୍ଜନ ଘଡାଇ, କୋରେଇ ବିଧାୟକ ଅଶୋକ ବଳ, ଜିଲ୍ଲାପରିଷଦ ଅଧ୍ୟକ୍ଷ ନରେଶ ଚନ୍ଦ୍ର ମହାନ୍ତି ପ୍ରମୁଖ ଯୋଗ ଦେଇ ଜିଲାର କଳା ଓ ସଂସ୍କୃତି ସାରା ରାଜ୍ୟରେ ପରିଚୟ ସୃଷ୍ଟି କରିପାରିଛି ବୋଲି କହିଥିଲେ ।
ଚଳିତବର୍ଷ ମହୋତ୍ସବ ଏବଂ ପଲ୍ଲିଶ୍ରୀ ମେଳା ଆସନ୍ତା 5 ଦିନ ଧରି ଚାଲିବ। ଅତିଥି ପଲ୍ଲିଶ୍ରୀ ମେଳାରେ ଲାଗିଥିବା ବିଭିନ୍ନ ଷ୍ଟଲକୁ ବୁଲି ଦେଖିଥିଲେ। ପ୍ରତିଦିନ ସଂଧ୍ୟାରେ ରାଜ୍ୟ ଓ ରାଜ୍ୟ ବାହାରର କଳାକାରଙ୍କ ଦ୍ବାରା ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ହେବାର କାର୍ଯ୍ୟକ୍ରମ ରହିଛି । ଉଦଘାଟନି ଉତ୍ସବରେ ଯୋଗ ଦେଇଥିବା ଅତିଥିଙ୍କୁ ଜିଲା ସଂସ୍କୃତି ବିଭାଗ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା ।
ସେହିପରି ନିକଟରେ ଆଇଟିବିପିର ଆଇଜି ଭାବେ ନିଯୁକ୍ତି ପାଇଥିବା ବଡଚଣା ଅଞ୍ଚଳର ସୁଧାଂଶୁ ଶେଖର ମିଶ୍ର ଏବଂ ଯାଜପୁରରେ ରହି ସ୍ବାଧିନତା ସଂଗ୍ରାମ ଆନ୍ଦୋଳନରେ ମୁଖ୍ୟ ଭୂମିକା ନିଭାଇଥିବା ରମାଦେବୀଙ୍କ ଆଶ୍ରମକୁ ଯଯାତି ସମ୍ମାନରେ ସମ୍ମାନିତ କରାଯାଇଥିଲା । ଏଭଳି ସମ୍ମାନ ପାଇବା ପରେ ବେଶ ଖୁସିବ୍ୟକ୍ତ କରିଥିଲେ ସମ୍ବର୍ଦ୍ଧିତ ପ୍ରତିଭା ।
ଏହି ମହୋତ୍ସବକୁ ଉପଭୋଗ କରିବା ସହିତ ପଲ୍ଲିଶ୍ରୀ ମେଳାରୁ ବିଭିନ୍ନ ଘରକରଣା ସାମଗ୍ରୀ କିଣିବା ପାଇଁ ଦର୍ଶକଙ୍କର ପ୍ରବଳ ଭିଡ ଦେଖିବାକୁ ମିଳିଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
