ଯାଜପୁର: ମଦ ଦୋକାନକୁ ବିରୋଧ କରି ତାତିଲେ ମହିଳା । ଏକାଠି ହୋଇ ଭାଙ୍ଗିଲେ ୩ଟି ବେଆଇନ ଦେଶୀ ମଦ ଦୋକାନ । ଏଭଳି ଘଟଣା ଦେଖିବାକୁ ମିଳିଛି ଯାଜପୁର ଜିଲ୍ଲା କୋରାଇ ଥାନା କଡମା ଅଞ୍ଚଳରେ । ଏହି ଅଞ୍ଚଳରେ ବେଆଇନ ମଦ କାରବାର ବୃଦ୍ଧି ପାଇଥିବା ବେଳେ ଏହାକୁ ବିରୋଧ କରି ମହିଳାମାନେ ହାତରେ ଝାଡୁ ଧରି ମଦ ଦୋକାନରେ ପହଞ୍ଚିଥିଲେ । ସେଠାରେ ବୋତଲରେ ଥିବା ସବୁ ମଦକୁ ରାସ୍ତାରେ ଢାଳିଦେବା ସହ ଦୋକାନ ଭଙ୍ଗାରୁଜା କରିଥିଲେ । ମଦ ବ୍ୟବସାୟୀଙ୍କ ସହ ଉତ୍ୟକ୍ତ ମହିଳାଙ୍କ ମୁହାଁମୁହିଁ ପରିସ୍ଥିତି ଉପୁଜିଥିଲା ।
ଫଳରେ ସେଠାରେ ଚାପା ଉତ୍ତେଜନା ଦେଖା ଦେବାରୁ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମହିଳାଙ୍କୁ ବୁଝାସୁଝା କରିଥିଲା । କିଛିଦିନ ହେବ ଏହି ଅଞ୍ଚଳରେ ବେଆଇନ ମଦ କାରବାର ବୃଦ୍ଧି ପାଇଥିଲା । ଘରର ରୋଜଗାରିଆ ପୁଅମାନେ ଦୈନିକ ମଦ ପିଇ ଘରେ କଳି ଝଗଡା ସୃଷ୍ଟି କରୁଥିଲେ । ଏମିତିକି ମହିଳା ମାନଙ୍କର ରାସ୍ତା ଘାଟରେ ବି ଚାଲିବା ମୁସ୍କିଲ ହୋଇ ଯାଇଥିଲା ।
ଭିଡିଓ ସୌଜନ୍ୟ: ସମ୍ବାଦଦାତା, ଯାଜପୁର