ପୁଣି ଅନ୍ଧବିଶ୍ବାସ ବନ୍ଧନ, ସାପ କାମୁଡ଼ା ରୋଗୀ ପାଇଁ ଚାଲିଛି ପୂଜାର୍ଚ୍ଚନା

ବିଷଧର ସାପ କାମୁଡି ଥିବା ଜଣେ ବ୍ୟକ୍ତିକୁ ଡାକ୍ତରଖାନା ନେବା ପରିବର୍ତ୍ତେ ମନ୍ଦିରରେ ପୂଜାର୍ଚ୍ଚନା କରିଛନ୍ତି ପରିବାର ଲୋକେ । ଯାଜପୁର ଜିଲ୍ଲା କୋରେଇ ବ୍ଲକ ଅନ୍ତର୍ଗତ ଅସନଝର ଗ୍ରାମରେ ଏହି ଭଳି ଏକ ଅନ୍ଧବିଶ୍ବାସ ଘଟଣା ସାମ୍ନାକୁ ଆସିଛି ।

ଯାଜପୁର: ଅନ୍ଧ ବିଶ୍ବାସର ଅନ୍ଧଗଳି । ବିଷଧର ସାପ କାମୁଡି ଥିବା ଜଣେ ବ୍ୟକ୍ତିକୁ ଡାକ୍ତରଖାନା ନେବା ପରିବର୍ତ୍ତେ ମନ୍ଦିରରେ ପୂଜାର୍ଚ୍ଚନା କରିଛନ୍ତି ପରିବାର ଲୋକେ । ମନ୍ଦିରରେ ଅଧିଆ ପଡିବା ସହିତ ଭୋଳାନାଥଙ୍କ ପାଖରେ ଘଣ୍ଟଘଣ୍ଟା ବଜାଇ ପୂଜାର୍ଚ୍ଚନା କରୁଥିବା ଦେଖିବାକୁ ମିଳିଛି । କେବଳ ଏତିକି ନୁହେଁ, ମେଡିକାଲକୁ ନେବାକୁ ଆସିଥିବା ଆମ୍ବୁଲାନ୍ସର ମଧ୍ୟ ସହାୟତା ନେଇ ନଥିଲେ । ଯାଜପୁର ଜିଲ୍ଲା କୋରେଇ ବ୍ଲକ ଅନ୍ତର୍ଗତ ଅସନଝର ଗ୍ରାମରେ ଏହି ଭଳି ଏକ ଅନ୍ଧ ବିଶ୍ବାସ ଘଟଣା ସାମ୍ନାକୁ ଆସିଛି ।

ଏହି ଗ୍ରାମର 45 ବର୍ଷୀୟ ରମାକାନ୍ତ ନାୟକ ଆଜି ବିଲକୁ ସାର ପକାଇବାକୁ ଯାଇଥିବାବେଳେ ତାଙ୍କୁ ଏକ ବିଷଧର ତମ୍ପ ସାପ କାମୁଡି ଦେଇଥିଲା । ସାପ କାମୁଡୁଥିବା ଜାଣିପାରି ସେ ସାଙ୍ଗେସାଙ୍ଗେ ବିଲରୁ ଘରକୁ ଆସୁଥିବା ସମୟରେ ଅଧା ବାଟରେ ସଂଜ୍ଞାହୀନ ହୋଇ ପଡିଯାଇଥିଲେ ।

ଗ୍ରାମବାସୀ ଦେଖିବା ପରେ ତୁରନ୍ତ ତାଙ୍କୁ ଉଦ୍ଧାର କରି ଆମ୍ବୁଲାନ୍ସକୁ ଫୋନ କରିଥିଲେ । କିଛି ସମୟ ପରେ ଆମ୍ବୁଲାନ୍ସ ଗ୍ରାମରେ ପହଞ୍ଚିଲା । କିନ୍ତୁ ପରିବାର ଲୋକେ ତାଙ୍କୁ ଗ୍ରାମରେ ଥିବା ଆଖଣ୍ଡଳମଣି ମନ୍ଦିରକୁ ନେଇଯାଇଥିଲେ । ଆଉ ଆମ୍ବୁଲାନ୍ସକୁ ଫେରାଇ ଦେଇଥିଲେ । ଗ୍ରାମର କିଛିବ୍ୟକ୍ତି ଆମ୍ବୁଲାନ୍ସରେ ରୋଗୀକୁ ନେବା ପାଇଁ ପରିବାର ଲୋକଙ୍କୁ କହିଥିଲେ ମଧ୍ୟ ସେ କାହା କଥା ଶୁଣି ନଥିଲେ । ଏହାପରେ ମନ୍ଦିରରେ ଏବେ ଭଜନ କିର୍ତ୍ତନ ଚାଲିଥିବା ବେଳେ ସାପ କାମୁଡି ଥିବା ରମାକାନ୍ତ ଏବେବି ମନ୍ଦିରରେ ଅଧିଆ ପଡି ରହିଥିବା ଦେଖିବାକୁ ମିଳିଛି ।

ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ