ଯାଜପୁର: ସୁକିନ୍ଦା ପୋଲିସର ଗୁଣ୍ଡାଗିରି । ଜଣଙ୍କୁ ଗିରଫ କରିବାକୁ ଯାଇ ଭୁଲ ଲୋକ ଘରେ ପଶିଲା ପୋଲିସ । ଖାଲି ସେତିକି ନୁହେଁ ବିନା କାରଣରେ ଜଣେ ନାବାଳିକା ମଧ୍ୟ ପୋଲିସ ମାଡର ଶିକାର ହୋଇଛନ୍ତି । ଘଟଣାକୁ ନେଇ ପୀଡିତା ଯାଜପୁର ଏସପିଙ୍କ ନିକଟରେ ଅଭିଯୋଗ କରିଛନ୍ତି ।
ଅଭିଯୋଗ ମୁତାବକ, ସୁକିନ୍ଦା ଥାନା ଅଞ୍ଚଳର ଜିତେନ୍ଦ୍ର ଦାସଙ୍କ ପୁଅ ଜ୍ଞାନରଞ୍ଜନ ଦାସଙ୍କ ନାମରେ ଗିରଫ ପରୱାନା ଜାରି ହୋଇଥିଲା । ତେବେ ପୋଲିସ ସେହି ବ୍ୟକ୍ତିଙ୍କୁ ଗିରଫ କରିବା ପରିବର୍ତ୍ତେ ସୁକିନ୍ଦାଗଡର ଅନ୍ୟ ଜଣେ ବ୍ୟକ୍ତି ଦିନରଞ୍ଜନ ଦାଶଙ୍କ ପୁଅ ଜ୍ଞାନରଞ୍ଜନ ଦାଶଙ୍କ ଘରକୁ ପଶିଯାଇଥିଲା । ଜ୍ଞାନରଞ୍ଜନଙ୍କ ଘର ବାରଣ୍ଡାରେ ଖେଳୁଥିବା ତାଙ୍କ 12 ବର୍ଷର ଝିଅକୁ ବାପା ନାଁ ପଚାରିବା ପରେ ଶକ୍ତ ଧକ୍କା ଦେଇ ଘର ଭିତରକୁ ପଶିଯାଇଥିଲା ପୋଲିସ ।
ତେବେ ଘରେ ତଳେ ପାଟି ହେଉଥିବା ଶୁଣି ଛାତରେ ଫୋନରେ କଥା ହେଉଥିବା ଜ୍ଞାନରଞ୍ଜନ ତଳକୁ ଓହ୍ଲାଇ ଆସିଥିଲେ । ପୋଲିସ ତାଙ୍କୁ ଅନେକ ଗାଳିଗୁଲଜ କରିବା ସହ ଟଣାଓଟରା କରିଥିଲା । ଉକ୍ତ ଘଟଣାରେ ଥାନାଧିକାରୀଙ୍କ ସମେତ ପୋଲିସର ଅନ୍ୟ କର୍ମଚାରୀମାନେ ସାମିଲ ଥିଲେ । ପରେ ଜ୍ଞାନରଞ୍ଜନ ଆଧାର କାର୍ଡ ଦେଖାଇ ନିଜର ପରିଚୟ ଦେବା ପରେ ପୋଲିସ ନିଜ ଭୂଲ ବୁଝିପାରି ସେ ସ୍ଥାନ ଛାଡି ପଳାଇଥିଲେ ।
ଭିଡିଓ ସୌଜନ୍ୟ: ସମ୍ବାଦଦାତା, ଯାଜପୁର ପୋଲିସ ଧକ୍କାରେ ନାବାଳିକା ଜଣଙ୍କ ଗୁରୁତର ହୋଇଥିଲେ । ଚିକିତ୍ସା ପାଇଁ ତାଙ୍କୁ କଟକ ନିଆଯାଇଥିଲା । ଘଟଣାକୁ ନେଇ ଜ୍ଞାନରଞ୍ଜନଙ୍କ ସ୍ତ୍ରୀ ସୁଶ୍ରୀ ସଙ୍ଗୀତା ଦାଶ ସୁକିନ୍ଦା ଥାନାଧିକାରୀ ବିଚିତ୍ରାନନ୍ଦ ସେଠୀଙ୍କ ନାଁରେ ଯାଜପୁର ଏସପି ଚରଣ ସିଂ ମୀନାଙ୍କ ନିକଟରେ ଅଭିଯୋଗ କରିଥିଲେ । ପୋଲିସର ଏଭଳି ଉନ୍ମତ୍ତକାଣ୍ଡକୁ ସାଧାରଣରେ ନିନ୍ଦା କରାଯାଇଛି । ସେପଟେ ଘଟଣାର ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ କଳିଙ୍ଗନଗର ଅତିରିକ୍ତ ଏସପିଙ୍କୁ ନିର୍ଦ୍ଦେଶ ଦିଆଯାଇଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
