ଯାଜପୁର: ଜିଲ୍ଲାର ବିଂଝାରପୁର ଥାନା ଅନ୍ତର୍ଗତ ମଧୁସୂଦନପୁର ଗ୍ରାମର 2 ବର୍ଷର ଶିଶୁ କନ୍ୟା ପିହୁ ନିଖୋଜକୁ 6 ମାସରୁ ଊର୍ଦ୍ଧ୍ବ ସମୟ ବିତିଯାଇଛି । ବର୍ତ୍ତମାନ ପୋଲିସ ଏହି ଘଟଣାରେ ତଦନ୍ତ ପ୍ରକ୍ରିୟାକୁ ଜୋରଦାର କରିଛି । ପୋଲିସ ବିଭିନ୍ନ ଦିଗକୁ ତର୍ଜମା କରି ତଦନ୍ତ କରୁଥିବା ବେଳେ ନିଖୋଜ ପିହୁର ଖବର ଦେବା ବ୍ୟକ୍ତିକୁ 20 ହଜାର ଟଙ୍କା ଦିଆଯିବ ବୋଲି ପୋଲିସ ଘୋଷଣା କରିଛି । ସେପଟେ ପିହୁକୁ ଅପହରଣ କରାଯାଇଛି ବୋଲି ପିହୁର ମା' କହିଛନ୍ତି ।
ପିହୁ ନିଖୋଜ ଘଟଣା: ଖବର ଦେବା ବ୍ୟକ୍ତିକୁ ମିଳିବ 20 ହଜାର ଟଙ୍କା
ଏହି ଘଟଣାକୁ 6 ମାସ ବିତିଯାଇଥିଲେ ମଧ୍ୟ ଅଦ୍ୟାବଧି ପୋଲିସ ପିହୁ ସମ୍ପର୍କରେ କୌଣସି ସୁରାଗ ପାଇବାରେ ସକ୍ଷମ ହୋଇପାରିନାହିଁ । ତେବେ ପୋଲିସ ବିଭିନ୍ନ ଦିଗକୁ ନେଇ ଏବେ ତଦନ୍ତକୁ ଜୋରଦାର କରିଛି । ରବିବାର ପୋଲିସ ମଧୁସୂଦନପୁର ଗ୍ରାମରେ ପହଞ୍ଚି ନିକଟସ୍ଥ ପୋଖରୀ ଗୁଡିକରେ ଖୋଜାଖୋଜି କରିଛି । ପିହୁର ଘର ନିକଟରେ ଥିବା ପୋଖରୀରେ ପମ୍ପ ଲଗାଇ ଶୁଖାଇବା କାର୍ଯ୍ୟ ଆରମ୍ଭ ହୋଇଛି ।