ଭୋଟ ବର୍ଜନ ନିଷ୍ପତ୍ତି ନମାନିବାରୁ ବନ୍ଦ କୋଠରୀରେ ବୃଦ୍ଧଙ୍କୁ ତାଲା, ମାଡ଼ ମାରିଲେ ଗ୍ରାମବାସୀ

ବଡଚଣା ନିର୍ବାଚନ ମଣ୍ଡଳୀରେ ନିର୍ବାଚନ ସମୟରେ ଦେଖିବାକୁ ମିଳିଛି ଏକ ଅଦ୍ଭୁତ ଘଟଣା। ଭୋଟ୍ ବର୍ଜନ ନିଷ୍ପତ୍ତି ନମାନି ମତଦାନ କେନ୍ଦ୍ରକୁ ଯାଇ ଭୋଟ ଦେବାରୁ ଆକ୍ରୋଶର ଶୀକାର ହୋଇଛନ୍ତି ଜଣେ ବୃଦ୍ଧ ଓ ଜଣେ ଯୁବକ। ଅଧିକ ପଢନ୍ତୁ

ଯାଜପୁର: ବଡଚଣା ନିର୍ବାଚନ ମଣ୍ଡଳୀରେ ନିର୍ବାଚନ ସମୟରେ ଦେଖିବାକୁ ମିଳିଛି ଏକ ଅଦ୍ଭୁତ ଘଟଣା। ଭୋଟ୍ ବର୍ଜନ ନିଷ୍ପତ୍ତି ନମାନି ମତଦାନ କେନ୍ଦ୍ରକୁ ଯାଇ ଭୋଟ ଦେବାରୁ ଆକ୍ରୋଶର ଶୀକାର ହୋଇଛନ୍ତି ଜଣେ ବୃଦ୍ଧ ଓ ଜଣେ ଯୁବକ। ଉଭୟଙ୍କୁ ନିସ୍ତୁକ ମାଡ ମାରିବା ସହିତ ଦୀର୍ଘ 12 ଘଣ୍ଟାରୁ ଉର୍ଦ୍ଧ୍ବ ସମୟ ଧରି ଏକ ବନ୍ଦ କୋଠରୀରେ ଅଟକ ରଖିଲେ ଗ୍ରାମବାସୀ ।

ଘଟଣା ଅନୁଯାୟୀ, ପଟ୍ଟା ନାହିଁ ତ ଭୋଟ ନାହିଁ ପରୱାନା ଜାରି କରି ବଡ଼ଚଣା ବ୍ଲକ ପାରିଆ ପଞ୍ଚାୟତ ହଦସାହିର ଆଦିବାସୀ ମାନେ ଭୋଟ ବର୍ଜନର ନିଷ୍ପତ୍ତି ନେଇଥିଲେ । ତାଙ୍କର ଅଭିଯୋଗ ହେଲା, 30ଟି ପରିବାର ଦୀର୍ଘ 40 ବର୍ଷ ଧରି ଏଠାରେ ବସବାସ କରିଆସୁଥଲେ ସୁଦ୍ଧା ତାଙ୍କୁ ଏପର୍ଯ୍ୟନ୍ତ ଜମିପଟ୍ଟାଟିଏ ମିଳିପାରୁ ନାହିଁ । ତେଣୁ, ଶତାଧିକ ପୁରୁଷ ଓ ମହିଳା ଏକତ୍ରୀତ ହୋଇ ଭୋଟ ବର୍ଜନ କରିଥିଲେ । ଗ୍ରାମରେ ସଭାକରି ସମସ୍ତଙ୍କୁ ଭୋଟ ନଦେବା ପାଇଁ ଚେତାବନୀ ଦେଇଥିଲେ ଗ୍ରାମବାସୀ ।

ତେବେ ଏହା ନମାନି ଗାଁର ଜଣେ ବୃଦ୍ଧ ଏବଂ ଅନ୍ୟ ଜଣେ ଯୁବକ ବୁଥକୁ ଯାଇ ଭୋଟ ଦେଇଥିଲେ । ପରିଣାମ ସ୍ବରୂପ ଗ୍ରାମବାସୀମାନେ ଦୁଇ ଜଣଙ୍କୁ ଗୋଟିଏ ଘରେ ପୁରାଇ ନିସ୍ତୁକ ମାଡ ମାରିବା ସହ ଅକଥନୀୟ ଅତ୍ୟାଚାର କରିଥିଲେ । ଏକଥା ପ୍ରଚାରିତ ହେବା ପରେ ବୈରୀ ପୋଲିସ ତୁରନ୍ତ ପହଞ୍ଚି ସେମାନଙ୍କୁ ଉଦ୍ଧାର କରି ଥାନାକୁ ଆଣିଥିଲେ । ଏହି ଘଟଣାରେ ବଡଚଣା ପୋଲିସ 4 ଜଣଙ୍କୁ ଥାନାରେ ଅଟକ ରଖି ଘଟଣାର ତଦନ୍ତ ଜାରି ରଖିଥିବା ଜଣାପଡିଛି ।

ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ