ଯାଜପୁର: ବାପା ଆରପାରିକୁ ଚାଲିଗଲା ପରେ ଶିଶୁମାନେ ହୋଇଗଲେ ବେସାହାରା । ଆଈ ପାଖରେ ରହି ବହୁ ଦୁଃଖକଷ୍ଟରେ ଦିନ କାଟୁଥିଲେ । ଭିନ୍ନକ୍ଷମ ବିଧବା ମା ପିଲାଙ୍କ ରକ୍ଷଣାବେକ୍ଷଣ କରିବା କିମ୍ବା ସେମାନଙ୍କ ଯତ୍ନ ନେବା କଷ୍ଟସାଧ୍ୟ ହୋଇପଡିଲା । ଶେଷରେ ନିରୁପାୟ ହୋଇ ମା ମଙ୍ଗଳବାର ତାଙ୍କ 3ଟି ଶିଶୁଙ୍କୁ ଜିଲ୍ଲା ଶିଶୁ ସୁରକ୍ଷା ୟୁନିଟକୁ ହସ୍ତାନ୍ତର କଲେ ।
ଅସହାୟ ମାଆ 3 ସନ୍ତାନଙ୍କୁ ଶିଶୁ ସୁରକ୍ଷା ୟୁନିଟକୁ କଲା ହସ୍ତାନ୍ତର
ଏପରି ଏକ ଘଟଣା ଦେଖିବାକୁ ମିଳିଛି ବ୍ୟାସନଗର ପୌରାଞ୍ଚଳର ପଦ୍ମପୁର ଅଞ୍ଚଳରେ । ଏହା ହେଉଛି ଏକ ଦଳିତ ପରିବାରର ଘଟଣା । ମହିଳାଙ୍କର ଅଛନ୍ତି 5 ପୁଅ ଝିଅ । ପରିବାରରେ ସ୍ବାମୀ ଥିଲେ ଏକମାତ୍ର ରୋଜଗାରକ୍ଷମ ବ୍ୟକ୍ତି । ତେବେ ସ୍ବାମୀଙ୍କୁ ହରାଇବା ପରେ ମହିଳା ଜଣକ ଏବେ କିଂକର୍ତ୍ତବ୍ୟ ବିମୂଢ ହୋଇଗଲେ । ପିଲାମାନଙ୍କ ଲାଳନପାଳନ, ଖାଦ୍ୟପେୟ, ପୋଷାକ, ପାଠପଢା ସବୁକିଛି ପାଇଁ ମା ଲାଚାର ହୋଇଗଲେ । ମାଗିଯାଚି ବା କେତେଦିନ କଣ କରିପାରିବେ । ଶେଷରେ ମହିଳା ଜଣକ ବାଧ୍ୟହୋଇ 3ଟି ଶିଶୁଙ୍କୁ ନେଇଯିବା ପାଇଁ ଜିଲ୍ଲା ଶିଶୁ ସୁରକ୍ଷା ୟୁନିଟ୍ ନିକଟରେ ଆପତ୍ତି ଜଣାଇଥିଲେ ।