କଣ୍ଟିଆକଣା ବାଲିଘାଟରୁ ଯୁବକଙ୍କ ମୃତଦେହ ଉଦ୍ଧାର, 2 ଦିନ ପୂର୍ବରୁ ଥିଲେ ନିଖୋଜ

ନିଖୋଜ ଯୁବକଙ୍କ ମୃତଦେହ କେନାଲରୁ ଉଦ୍ଧାର । ଯାଜପୁର ରୋଡ ଥାନା କଣ୍ଟିଆକଣା ବାଲିଘାଟରୁ ସମ୍ପୃକ୍ତ ଯୁବକଙ୍କ ମୃତଦେହ ଉଦ୍ଧାର। ଅଧିକ ପଢନ୍ତୁ

ଯାଜପୁର: କଣ୍ଟିଆକଣା ବାଲିଘାଟରୁ ନିଖୋଜ ଯୁବକଙ୍କ ମୃତଦେହ ଉଦ୍ଧାର । ଯାଜପୁର ରୋଡ ଥାନା ମୁଣ୍ଡମାଳ ଗ୍ରାମରେ ଘଟିଛି ଅଭାବନୀୟ ଘଟଣା । ମୃତ ବ୍ୟକ୍ତି ଉକ୍ତ ଗ୍ରାମର ଯୁବକ ମାଧବ ମହାରଣା ଗତ ଦୁଇ ଦିନ ହେଲା ନିଖୋଜ ଥିବା ଜଣାପଡିଛି । ପୋଲିସ ଘଟଣାସ୍ଥଳରୁ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ।

ସୂଚନାଅନୁସାରେ, ଯାଜପୁର ରୋଡ ଥାନା ମୁଣ୍ଡମାଳ ଗ୍ରାମର ଯୁବକ ମାଧବ ମହାରଣା ଗତ ୨ ଦିନ ହେବ ନିଖୋଜ ଥିବା ତାଙ୍କ ପତ୍ନୀ ରଶ୍ମିତା ଅଭିଯୋଗ କରିଥିଲେ। ଏନେଇ ଯାଜପୁର ରୋଡ ପୋଲିସ କେସ ନମ୍ବର ୧୪/୨୨ରେ ଏକ ନିଖୋଜ ମାମଲା ରୁଜୁ କରି ଘଟଣାର ତଦନ୍ତ କରୁଥିଲା। ତେବେ ଗତକାଲି ଯାଜପୁର ରୋଡ ପୋଲିସ ଓ କୁଆଖିଆ ପୋଲିସର ସହଯୋଗରେ ବିଭିନ୍ନ ଅଂଚଳରେ ଚଢ଼ାଉ କରି ମାଧବଙ୍କ ମୃତ ଦେହକୁ କଣ୍ଟିଆକଣା ନିକଟରୁ ଉଦ୍ଧାର କରିଛି ।

ସେପଟେ ମୁଣ୍ଡମାଳ ଗାଁରେ ମାଧବଙ୍କୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି ପତ୍ନୀ । ଏଥିସହ ହତ୍ୟାକାଣ୍ଡ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରୁବାକୁ ପରିବାର ପକ୍ଷରୁ ଦାବି କରାଯାଇଛି । ତେବେ କେଉଁ ପରିସ୍ଥିତିରେ ଯୁବକଟିର ମୃତ୍ୟୁ ଘଟିଛି, ସେ ନେଇ ଖୋଳତାଡ କରୁଛି ପୋଲିସ ।

ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ